Anina Bada Idia Havaraia Baibel Stadi Oi Karaia
1 Dahaka gau tamona ia vara sisita ta Tanzania dekenai, kekeni matamatana ta Argentina dekenai, bona sina ta Latvia dekenai? Lagani 1997 Yearbook (rau 8, 46, bona 56) ia gwau idia toi be edia Baibel stadi karana dainai idia goada idia lao haraga, badina idia ura bada nega tamona sibona stadi idia abia lasi to pura ta ta lalonai nega rua eiava toi Diba bukana idia stadilaia. Pablisa ai hadibadia bema ia hegeregere stadi ta ta ai karoa tamona idia karaia be namo. To, haida idia davaria unai idia karaia be auka. Stiuden ena mauri dalana bona diba hegeregerena do ita laloa danu, to hadibaia taudia namodia ese inai hereva idia gaukaralaidia dainai idia kwalimu.
2 June 1996 ena Iseda Basileia Gaukara lalonai idia udaia pepana ese ia hahedinaraia bamona, namona be stiuden oi hadibaia edia stadi idia hegaegaelaia totona. Matamana ai, unai oi gwauraia hedinarai bona stadi karaia dalana oi hahedinaraia be namo. Oi sibona emu Diba bukana, oi hahedinaraia ia dekenai. Kahana ginigunana umui hegaegaelaia hebou. Stiuden tauna oi durua idia torea henanadai edia haere maorodia ia davaria bona umui makaia. Pablisa haida be stiuden taudia dekenai highlighter idia henia edia buka idia makaia totona. Stiuden taudia oi hagoadaia stadi idia hegaegaelaia neganai, Baibel siri ibounai idia duahia. Unai bamona oi karaia neganai, Kongregesen Buka Stadi bona Gima Kohorona stadi totona idia hegaegae dalana oi hadibaia noho danu.—Luka 6:40.
3 Hadibaia tauna namona ese stiuden tauna ena lalona do ia veria bona idia herevahereva hebou diba bona unai amo hadibaia tauna sibona do ia hereva lasi. Ia naria namonamo anina bada lasi gaudia ia herevalaia momo garina. Bona hereva ma haida ia atoa kau lasi. To, unai karoa ena hereva badadia ia herevalaia bona hahedinaraia. Pablisa haida be stiuden taudia dekenai magasin eiava buka ma haida idia henia, henanadai edia haere davaria totona. Ma danu, kamonai taudia be ma diba namona do idia abia, kongregesen heboudia dekenai idia lao neganai.
4 Reana idia atoa Baibel siri iboudiai umui itaia lasi. Paragraf lalonai idia torea Baibel siridia edia hereva badadia haida oi gwauraia hedinarai diba. Riviu henanadai oi karaia neganai, Baibel siri badadia oi hahedinaraia bona stiuden oi hagoadaia do ia laloatao totona.
5 Kahana Ta Ta Ena Lata be Edena Bamona?: Stadi be hora tamona sibona lalonai ita karaia ena taravatu ta be lasi. Stiuden haida be mai edia nega dainai, sedira idia ura stadi be sisina daudau umui karaia diba. Eiava stiuden ia ura pura tamona lalonai nega rua eiava toi ia stadi. Ia karaia diba tauna dekenai unai be namo.
6 Isaia 60:8 ia gwau bamona, hari Iehova idia hanamoa taudia matamatadia handred tausen momo be “ori bamona idia heau noho . . . idia be manu, edia ruma dekenai idia giroa lou bamona” iena taunimanima edia kongregesen lalodiai idia vareai. Namona be ita iboudiai be iseda kahana ita karaia bona Iehova ida ita gaukara, ia ese mamoe bamona taudia haboua gaukarana ia haharagaia neganai.—Isa. 60:22.