Ma Haida ida Emu Ruma Bese Hamoalea Dalana Bukana Herevalaia
1 Ruma bese be taunimanima edia badina oreana, bona ruma bese amo hanua, siti, taoni, bona bese ibounai idia mai. Hari inai negai, ruma bese be metau momo idia davaria, guna unai bamona idia davaria lasi. Ruma bese ena noho dalana idia hadikaia diba siahu karadia idia vara noho. Iehova, ruma bese ia Havaraia Tauna, ita tanikiu henia bada, badina ia ese hakaua herevadia ia henia ita dekenai bona ruma bese hamoalea dalana ita davaria diba! Iena hakaua herevadia idia badinaia taudia ese idia davaria edia hekwakwanai idia hamaragia diba bona ruma bese namona idia abia. September lalonai ita be hahenamo ta do ita abia, Emu Ruma Bese Hamoalea Dalana bukana be ma haida dekenai do ita hariharilaia. Namona be dala ita tahua taunimanima ida ruma bese hamoalea dalana ita kikilaia totona. Namona be hetura dalanai, mai lalo-moale ida, bona mai lalo-parara ida ita hereva henidia. Reana dahaka do oi gwau?
2 Reana inai bamona henanadai ta amo emu hereva oi hamatamaia diba:
◼ “Ruma bese momo be mauri ena metau idia haheaukalaia totona idia hekwarahi bada oi itaia, a? [Haere naria.] Sivarai momo idia hahedinaraia taunimanima momo ese edia ruma lalonai hekwakwanai momo idia davaria. Dahaka oi laloa be ruma bese do ia durua idia noho namo bona moale bada do idia davaria totona? [Haere naria.] Dirava ese ruma bese ia hamatamaia dainai, ia henia hakaua herevadia ita tahua be laloa maoromaoro karana, ani? [2 Timoteo 3:16, 17 duahia.] Unai bamona durua herevadia be inai buka, Emu Ruma Bese Hamoalea Dalana, lalonai oi davaria diba.” Bena, ruma tauna oi nanadaia edena hekwakwanai badana be ruma bese momo lalonai ia noho, unai hekwakwanai ia herevalaia karoa oi hahedinaraia, bona buka oi hariharilaia, ena davana be 50 toea.
3 Oi lou henia neganai, reana inai hereva amo Baibel stadi do oi hamatamaia:
◼ “Lau ese emu hereva ruma bese maurina dekenai lau laloa, bona lau diba do oi moalelaia gauna ta oi totona lau mailaia. [Dahaka Ita Karaia? buklet oi hahedinaraia, oi kehoa rau 16 dekenai, bona ataiai idia noho henanadai 6 oi duahia.] Momokani, namona be ruma bese taudia ta ta ese edia kahana idia karaia ruma bese ena moale habadaia totona. Bema oi be mai emu nega, do lau hahedinaraia edena bamona heduru bada oi abia diba inai hereva amo.” Bena kahana 8 umui stadilaia matamaia. Buklet oi hariharilaia, ena davana be 40 toea, bona dala oi hegaegaelaia ma nega ta do umui stadilaia noho totona.
4 Herevahereva oi hamatamaia diba dalana ta be hekwakwanai ta oi gwauraia, reana do oi gwau:
◼ “Ena be taunimanima ibounai idia ura edia lalona idia namo hemamina idia davaria, to ita itaia ruma bese momo be unai idia davaria lasi. Moale korikorina idia davaria totona oi laloa idia do ia durua gauna be dahaka? [Haere naria.] Gunaguna, Baibel ia hahedinaraia hari inai negai ruma bese lalodiai edena bamona hekwakwanai do ita itaia. [2 Timoteo 3:1-3 duahia.] To, Baibel be ruma bese ese unai hekwakwanai idia hamaoromaoroa totona dahaka idia karaia diba bona moale hanaihanai idia davaria dalana ia hahedinaraia danu. Unai hakaua herevadia be inai buka, Emu Ruma Bese Hamoalea Dalana lalonai idia noho.” Bena inai buka idia karaia ena badina rau 2 dekenai oi duahia bona oi hariharilaia, ena davana be 50 toea.
5 Oi giroa neganai, “Dahaka Ita Karaia?” buklet oi gaukaralaia stadi hamatamaia totona. Reana oi gwau:
◼ “Lau moale bada badina guna oi hahedinaraia oi ura bada Baibel ena hakaua herevadia ruma bese dekenai oi tahua. Momo idia davaria vadaeni, Baibel lalonai ia noho sisiba badinaia karana amo, namo bada idia davaria. Inai haere haragana amo ita davaria dahaka dainai unai be momokani.” Dahaka Ita Karaia? buklet ena kahana namba 1 ena paragraf ginigunana oi duahia, bona Salamo 1:1-3 eiava Isaia 48:17, 18 oi duahia danu. Bema ia hegeregere, unai kahana oi karaia haorea bona hahedinaraia buklet ena davana be 40 toea sibona. Oi hamaoroa bema ia ura do oi giroa lou, murina kahana ta umui stadilaia hebou totona.
6 Iseda Buka Bona Magasin: Reana nega haida oi ura buka eiava magasin do oi henia kava tau ta dekenai, badina ia gwau ia be moni lasi idia ia abia totona, a? Momokani, taunimanima haida idia hegeregere lasi momokani moni henia iseda magasin o buka abia totona, to nega momo unai be momokani lasi. Oi itaia taunimanima momo idia gwau idia be moni lasi, to edia moni be anina lasi gaudia dekenai idia negea, ani? Nega momo, magasin eiava buka henia kava karana be aonega lasi karana. Unai ese taunimanima momo ia durua lasi unai gaudia edia namo idia laloa bada totona. Badina ta be lasi ta ia hemarai bona ia laloa magasin eiava buka ia hoihoilaia, badina taunimanima ia noia moni sisina idia henia printaia bona halasia ena davana durua totona.
7 “Ruma Bese” bukana oi hariharilaia murinai, reana inai bamona oi hereva diba:
◼ “Bema oi ura inai buka ena kopi ta oi abia, hari ai hariharilaia bona ena davana maragina be 50 toea sibona.” Bema ruma tauna ia gwau ia ura ia abia to ia be moni lasi, ita hamaoroa diba do ita lou henia ia hegeregere neganai, bona reana pepapepa namona ta ita henia. Bema magasin eiava buka ita henia kava matamaia, eiava ena davana korikori ai ita hariharilaia lasi neganai, ita murinai do idia mai pablisa ita hahewakwanaia diba. Nega haida taunimanima idia hoa davana idia gwauraia neganai, badina guna Witness taudia ese magasin eiava buka idia henia, davana lasi. Momokani, varavara ita hereva henia eiava ita diba taudia ma haida ita haroro henia neganai, reana ita ura harihari gauna bamona ita henia bona davana do ita noia lasi.
8 Namona be ita hekwarahi ma haida dekenai ruma bese hamoalea dalana ita hahedinaraia—ia be Dirava ena Hereva ena hakaua herevadia badinaia.—Sal. 19:7-10.