Taunimanima Ma Haida Dekenai Mauri Hanaihanai Ena Helaro Ita Henia
1 Ena be taunimanima be dala idauidau idia tahua buruka karana idia koua bona edia mauri idia halataia totona, to buruka bona mase be vaia idia do vara noho. Ita moale badina Baibel ese ia hahedinaraia dahaka dainai taunimanima be idia buruka idia lao bona idia mase, bona edena bamona buruka ena hisihisi bona mase be do idia ore. Unai hereva momokanidia be Diba ese Mauri Dekenai Ita Ia Hakaua Lao bukana lalonai idia hedinarai namonamo. Unai buka be mauri bona mase ena henanadai ia haerelaidia goevagoeva, bona ia be duahia tauna dekenai Paradaiso haginia lou negana ia hahedinaraia.
2 March lalonai Diba bukana do ita hariharilaia bona iseda tahua gauna be Baibel stadi do ita hamatamaia. (Mat. 28:19, 20) Bena ita be Basileia sivaraina idia kamonai taudia iboudiai do ita lou henidia. Unai dala amo ita be taunimanima ma haida dekenai mauri hanaihanai ena helaro ita henia diba. (Tito 1:2) Unai ita karaia totona, reana inai hereva amo heduru do oi abia diba.
3 Vadivadi ginigunana oi karaia neganai, reana inai henanadai oi henia diba:
◼“Nega haida oi laloa dahaka dainai taunimanima idia ura dikadika idia mauri daudau? [Haere naria.] Buddhist taudia, Keristani taudia, Hindu taudia, Muslim taudia, bona ma taunimanima haida be mai edia helaro, mase murinai mauri do idia abia helarona unai.” Diba bukana oi kehoa karoa 6 dekenai, ena ladana be “Dahaka Dainai Ita Buruka Ita Lao Bena Ita Mase?,” bona paragraf 3 oi duahia. Idia gwauraia siridia oi herevalaia. Ruma tauna oi noia bema ia sibona be paragraf ena dokona ai idia noho henanadai rua edia haere ia ura itaia. Bema iena ura be unai, murina paragraf haida umui herevalaia. Baibel stadi ta oi hamatamaia unai! Bema lasi, buka oi hariharilaia, ena davana be K1.50, bona dala oi hegaegae oi lou henia totona, dina ta o rua murinai be namo, haere umui kikilaidia totona.
4 Bema “Diba” bukana oi hariharilaia vadaeni, oi gwau diba:
◼“Vanegai mase ita kikilaia neganai, henanadai rua ita haerelaia lasi, lau giroa mai edia haere ita tahua totona.” Ruma tauna dekenai unai henanadai rua oi gwauraia lou. Bena karoa 6 dekenai hereva kwarana maragina, “Palani Dikana Ta” henunai idia noho hereva umui kikilaia. Ruma tauna ena ura hegeregerena, stadi oi karaia noho eiava paragraf 7 ena dokona ai ia noho henanadai ginigabena oi gaukaralaia murina stadi ena badina oi lailaia totona. Nega umui abia hidi oi lou henia totona. Boiboi pepana oi henia ruma tauna dekenai, bona kongregesen hebou daladia oi gwauraia sisina. Ia oi boiria mai hebou dekenai.
5 Ruma-ta-ruma-ta gaukara dekenai eiava nega bona gabu idaudia ai oi haroro neganai, herevahereva be inai bamona do oi hamatamaia diba:
◼“Nega haida oi laloa vaira negana ai dahaka do ia vara ita dekenai bona tanobada dekenai, a? [Haere naria.] Hereva tamona amo Baibel be vaira negana ia gwauraia—Paradaiso! Ia gwau matamana ai, Dirava ese tanobada ena kahana ta be paradaiso mai hairaina ai ia halaoa, bona ia havaraia taunimanima ginigunadia be unuseniai ia atodia. Idia ese tanobada do idia hahonua, bona metairametaira tanobada ibounai be paradaiso ai do idia halaoa. Unai nega ena toana be inai hereva ese ia gwauraia, mani oi itaia.” Diba bukana oi kehoa rau 8, bona paragraf 9, hereva kwarana maragina “Mauri, Paradaiso Lalonai” henunai oi duahia. Bena paragraf 10 ai idia noho herevadia umui kikilaia, bona idia gwauraia siri, Isaia 55:10, 11, oi duahia. Oi hamaoroa oi ura Paradaiso matamatana dekenai ena mauri be edena bamona do umui kikilaia noho bona paragraf 11-16 do umui herevalaia hebou. Eiava buka oi hariharilaia bona ia oi hagoadaia sibona ia duahia, bona do umui hedavari lou dalana oi hegaegaelaia buka umui kikilaia lou totona.
6 Bema guna stadi oi hamatamaia lasi, lou henia oi karaia neganai reana inai hereva amo stadi oi hamatamaia toho:
◼“Guna ita kiki neganai ita gwau Dirava ena ura be tanobada ibounai be paradaiso ai do ia halaoa. Unai ese inai henanadai ia havaraia, Paradaiso ena toana be edena bamona? ” Diba bukana oi kehoa karoa 1 dekenai, bona ena sinado “Mauri, Paradaiso Matamatana Lalonai” henunai, paragraf 11-16 umui stadilaia. Unai murinai rau 4-5 ai ia noho laulauna oi hahedinaraia, bona oi nanadaia bema unai gabu hairaina dekenai ia ura noho. Bena rau 10 dekenai, paragraf 17 ena hereva ginigunana oi duahia. Unai tauna ena ura hegeregerena, stadi oi karaia noho eiava ia oi hamaoroa oi giroa lou neganai do oi hahedinaraia tau ta be dahaka ia karaia be namo do ia vara Paradaisona dekenai ia noho totona. Ia dekenai boiboi pepana oi rakatania, hebou ena sediual oi gwauraia, bona ia oi boiria mai Kingdom Hall dekenai.
7Diba bukana be tulu namona ta, Dirava ese ia gwauhamatalaia “mauri hanaihanai” be taunimanima dekenai oi gwauraia hedinarai totona. Taunimanima ida Baibel stadi oi karaia neganai, oi be ia “koikoi diba lasi” Diravana ena lauma amo ia mai helaro namona oi henidia.