Kongregesen Idia Hakaua Taudia—Seketere
1 Kongregesen ena seketere ena gaukara be mai anina bada. Ia itaia ‘gaukara ibounai idia karaia namonamo, dala maorona ai, bona idia karaia kava lasi.’ (1 Kor. 14:40) Ia be Kongregesen Hesiai Komiti ena elda ta, bona ia be kongregesen ena revareva idauidau bona anina bada faila iboudiai ia naria. Ena be taunimanima iboudiai be iena gaukara idia itaia diba lasi, elda taudia ma haida edia gaukara idia itaia diba hegeregerena, to iena gaukara be mai anina bada bona ita laloa bada.
2 Revareva be Society eiava ma gabu ta amo idia mai neganai, seketere be edia badina ia tahua bona bema haere ia siaia be namo, unai ia karaia. Idia abia revarevadia ia henia elda taudia dekenai idia duahia totona bena faila dekenai ia atodia. Magasin bona buka edia oda fom ia sekea bena Society dekenai ia siaidia. Akaun, sabskripsen, bona hebouhebou gaudia idia naria tadikakadia ia naria.
3 Namona be seketere be hua ena dina namba 6 ia do abia lasi neganai, kongregesen ena hua ta ta haroro ripoti ia siaia Society dekenai, unai dainai gau badana be ita ibounai be hua ena dokonai iseda haroro gaukara ita ripotilaia haraga. Bena ia ese haroro ripoti iboudiai, Kongregesen ena Pablisa Rekod Kadi dekenai ia torea. Pablisa taudia iboudiai be seketere idia noia diba sibodia edia gaukara ena rekod kadi idia itaia totona.
4 Pablisa ta be kongregesen ma ta dekenai ia hanaia lao neganai, seketere ese kongregesen gunana ia noia bema unai pablisa idia diba totona revareva ta bona ena Kongregesen Pablisa Rekod kadi do idia siaia. Eiava bema pablisa ta be iena kongregesen ia rakatania unai gaudia do ia siaia kongregesen matamata dekenai.—Hesiai Gaukara bukana, rau 105.
5 Seketere ese painia taudia edia gaukara ia riviulaia, bona painia taudia ese hekwakwanai haida idia davaria neganai, ia ese elda taudia, bona namona be haroro naria tauna, ia hamaorodia. Ia ese Kongregesen Buka Stadi idia naria taudia ia hadibaia bema haroro gaukara idia karaia hanaihanai lasi pablisa taudia haida idia noho. Seketere bona haroro naria tauna ese dala idia hegaegaelaia idia haroro lasi pablisa taudia idia durua totona.—Iseda Basileia Gaukara pepana, December 1987, rau 4.
6 Seketere ena gaukara ita lalo-pararalaia dainai, namona be ia ita durua mai hekwarahi lasi ida iena gaukara ia karaia totona.—1 Kor. 4:2.