Anina Oi Havaraia Emu Haroro Gaukara Lalonai

¹ Guba ia dibura ia lao, bona gari ia havaraia rege idauna ta be ia bada daekau momokani. Kwalahu bamona ori ta ia diho. Ia be dahaka? Kwadi milioni momo edia orea ta ia mai, tano idia hadikaia ore totona! Peroveta tauna Ioela ese ia gwauraia gauna be hari Dirava ena horoa hesiai taudia bona edia bamodia, hutuma bada taudia, edia haroro gaukara lalonai ia guguru.

² Gima Kohorona, May 1, 1998, rau 11, paragraf 19, ia gwau: “Dirava ena kwadi oreana taudia hari inai negai ese haroro namona idia henia Kerisendom ena ‘hanua’ lalonai. (Ioela 2:9) . . . Iehova ena hereva idia gwauraia totona, hekwakwanai iboudiai idia do hanaia noho, ruma milioni momo idia vareai noho, dala dekenai, telefon amo, bona dala idauidau amo, taunimanima idia hereva henidia.” Dirava ese ia henia gaukarana ita karaia be hahenamo badana, ani?

³ Kwadi korikoridia edia ura tamona be sibona idia ubua, to ita, Iehova ena hesiai taudia, be idia bamona lasi. Ita ese ita haroro henia taudia edia mauri ita laloa bada. Ita ura taunimanima ma haida ita durua Dirava ena Hereva lalonai idia noho hereva momokanidia idia dibaia totona, bona idia ita ha-uraia kara haida idia karaia mauri hanaihanai idia abia totona. (Ioa. 17:3; 1 Tim. 4:16) Unai dainai, ita ura iseda haroro gaukara ese anina do ia havaraia. Herevana edena dala amo haroro gaukara ita karaia, namona be ita laloa bema iseda karaia dalana bona ita karaia negana ese anina namona ia havaraia. “Inai tanobada, hari ia noho toana bamona, be kahirakahira do ia ore” dainai, ita ese anina bada ita havaraia totona, namona be iseda karaia dalana bona hereva dalana ita laloa namonamo.​—1 Kor. 7:31.

⁴ Ena be dala idauidau amo taunimanima ita davaria toho, to ruma-ta-ruma-ta gaukarana be iseda haroro gaukara karaia dalana badana. Nega momo taunimanima be edia ruma dekenai idia noho lasi eiava oi vadivadi henidia neganai idia mahuta, a? Unai be lalohisihisi gauna, badina idia dekenai sivarai namona oi herevalaia diba lasi! Edena bamona unai hekwakwanai oi hanaia diba?

⁵ Nega Oi Haidaua Bona Oi Kara Mai Aonega Ida: Aposetolo taudia edia nega ai, Israela lalonai, haoda taudia be hanuaboi ai idia haoda. Dahaka dainai hanuaboi ai unai idia karaia? Ena be idia dekenai unai be nega namona lasi, to unai nega be nega namona gwarume momo idia abia totona. Unai be gwarume momo davaria negana. Gima Kohorona, June 15, 1992, be unai kara ia herevalaia, ia gwau: “Namona be ita danu iseda teritori do ita laloa namonamo, bona taunimanima momo idia noho neganai bona idia ura kamonai negana lalonai haoda gaukarana ita karaia.” Taunimanima edia kara ita itaia namonamo neganai, ita davaria siti eiava taoni lalonai taunimanima be reana Saturday bona Sunday dabai ruma dekenai idia noho, to idia momo idia ura lasi unai nega ai idia ita vadivadi henia. Bema oiemu teritori dekenai unai bamona oi davaria, reana idia oi vadivadi henia negana oi haidaua diba bona 10 okaloka murinai eiava adorahi kahana ai idia dekenai do oi lao diba, a? Unai be dala namona iseda haroro gaukara ena anina ita habadaia bona iseda dekena taudia ita laloa totona. Unai be Keristani lalokau korikorina ena toana ta.​—Mat. 7:12.

⁶ Filipi 4:5 ai, aposetolo Paulo ese ita ia hamaoroa namona be ‘iseda manau bona manada kara taunimanima ibounai edia vairanai do ita hedinaraia.’ Dirava ese ia henia hakaua herevana hegeregerena, ita ura mai laloa namonamo ida iseda haroro gaukara ita karaia mai lalo-goada bona mai moale ida. Ita ura taunimanima edia ‘ruma dekenai, bona taunimanima edia vairana dekenai durua hereva ta ita hunia lasi,’ to ita ura iseda ruma-ta-ruma-ta gaukarana be nega namodia ai ita karaia bona anina ia havaraia negadia ai. (Kara 20:20) Aposetolo taudia edia nega ai, Israela dekenai idia noho haoda taudia bamona, ita ura ita ‘haoda’ ita sibona dekenai ia hegeregere negadia ai lasi, to anina ia havaraia diba negadia ai.

⁷ Dahaka ita haidaua diba? Haroro hebou momo be dabai 8:30 eiava 9:00 Saturday bona Sunday ai ita karaia, bena unai murinai haroro taudia be maoromaoro teritori dekenai ruma-ta-ruma-ta gaukarana idia karaia. To, elda oreadia haida be idia hegaegae haroro taudia ese dala idauidau ai haroro gaukara idia karaia totona, hegeregere, ruma-ta-ruma-ta gaukarana idia do karaia lasi neganai, haroro gaukara idia karaia dala dekenai, bisinesi teritori ai, eiava lou henia idia karaia neganai. Kongregesen ma haida be dabai​—10, 11, eiava 12 okaloka ai​—haroro ena hebou idia karaia. Unai murinai, haroro taudia be maoromaoro ruma-ta-ruma-ta gaukarana dekenai idia lao bona unai idia karaia ela bona adorahi. Teritori haida lalonai, reana dabai be nega namona lasi to adorahi be nega namona haroro ena hebou karaia totona. Reana nega ita haidaua dainai, ruma-ta-ruma-ta gaukarana ai anina bada do ita havaraia.

⁸ Mai Lalo-Parara Bona Hemataurai ida Oi Kara: Ruma-ta-ruma-ta gaukarana dekenai taunimanima ita davaria bona iseda sivarai idia kamonai neganai, edia kara be idauidau. Ruma taudia haida idia kamonai, ma haida be sivarai idia laloa bada lasi, bona haida idia ura ita danu idia hepapahuahu eiava idia badu. Buka Helaga Herevalaia bukana, rau 7 ai, ita ia hamaoroa bema taunimanima idia badu ita dekenai ita ura lasi “hereva momokani idia matauraia lasi taudia [ita] halusidia . . . idia ida [ita] herevahereva neganai.” Bema ruma tauna ia badu, namona be ia ita rakatania. Namo lasi taunimanima ita habadua, badina idia ita doria ita ida idia herevahereva eiava iseda lalohadai idia abia dae totona. Taunimanima ita doria lasi iseda sivarai idia kamonai henia totona. Unai be maoro lasi bona reana ma Witness taudia haida dekenai bona haroro gaukara dekenai hekwakwanai ia havaraia diba.

⁹ Teritori dekenai, iseda haroro gaukara ita do hamatamaia lasi neganai, gau badana be ita idia hamaoroa edia ruma do ita vadivadi henia lasi taudia ita laloa. Namona be unai taudia edia adres be teritori kadi danu idia noho. Bema unai adres haida idia noho, namona be unai dala eiava blok dekenai idia haroro pablisa taudia ta ta ibounai idia diba edena ruma dekenai idia lao lasi. Namo lasi tadikaka ta be iena lalona ia hadaia unai ruma dekenai do ia lao bema haroro naria tauna ese gwau maoro ia henia lasi.​—June 1994 Iseda Basileia Gaukara, Henanadai Mauana itaia.

¹⁰ Ruma-ta-ruma-ta gaukarana ita karaia neganai, anina ita havaraia diba bema mai lalo-parara ida ita karaia. Ruma ta dekenai oi raka lao neganai, gabu oi itaia namonamo. Uindo dabua idia koua, a? Regerege be lasi, a? Reana ena anina be ruma taudia idia mahuta. Bema gabeai unai ruma dekenai ita giroa lao, reana ruma tauna ida do ita herevahereva namonamo. Reana hari unai ruma ita karaia lasi be namo, to ruma ena namba ita torea. Teritori oi rakatania gwauraia neganai, unai ruma dekenai oi giroa lao diba, eiava oi torea adorahi ta ai do oi giroa lao totona.

¹¹ Reana nega haida, tau ta do ita hanogaia eiava ena gaukara ta do ita hadikaia. Reana ena toana be ia moale lasi eiava ia badu. Dahaka ita karaia be namo? Aonega Herevadia 17:27 ena sisiba be inai: “Ia badu haraga lasi tauna, be mai ena lalona kehoa.” Ena be iseda haroro gaukarana dainai sori herevana ita gwauraia lasi, to nega namona lasi ai ia ita vadivadi henia dainai sori herevana ita gwauraia diba. Reana mai manau ida ita noia bema ma nega ta be hegeregere ia dekenai ita giroa lao totona. Bema mai manau ida ita gwau ia ita laloa, nega momo unai ese tau ta ena badu ia koua. (Aon. 15:1) Bema ruma tauna ese ita ia hamaoroa hanuaboi ai moni gaukara ia karaia hanaihanai, teritori kadi dekenai unai ita torea bena gabeai nega maorona ai unai ruma dekenai ita haroro diba.

¹² Iseda teritori ita karaia namonamo neganai, mai lalo-parara ida ita karaia be namo. Taunimanima momo be ruma dekenai idia noho lasi dainai, namona be nega idauidau ai idia dekenai hahemauri sivaraina ita herevalaia toho. (Roma 10:13) Ripoti idia hahedinaraia nega haida pablisa taudia be dina tamona ai nega momo ruma tamona dekenai idia lao ruma taudia idia davaria totona. Ruma taudia edia dekena taudia be unai kara idia itaia. Reana unai kara dainai, taunimanima do idia laloa Iehova ena Witness taudia be edia dala dekenai idia ‘haroro hanaihanai.’ Edena dala amo unai ita koua diba?

¹³ Namona be mai lalo-parara ida ita kara. Guna, ta ia noho lasi rumana dekenai ita giroa lao neganai, toana be hari taunimanima ta ia noho, eiava toana be ruma tauna ia do noho lasi, a? Bema nega idauidau ai, hegeregere adorahi ai, ruma tauna oi davaria lasi, gabu haida dekenai telefon amo ruma tauna oi hereva henia diba. Bema lasi, pepapepa maragina eiava boiboi pepana be edia iduara henunai oi rakatania diba. Unai kara be namo bema nega momo unai teritori dekenai ita haroro. Reana gabeai unai teritori dekenai ita haroro neganai, unai tauna ita davaria diba.

¹⁴ Bema medu bada herea ia diho, namo lasi ruma tauna ida nega daudau ita herevahereva. Bema ita idia boiria ruma lalonai, namona be ita naria namonamo foloa ita hamiroa garina. Mai lalo-parara ida ita kara bema ita dekenai sisia ia kwaru. Flats dekenai ita haroro neganai, ita hereva badabada lasi bona ruma taudia ia habadua regena eiava idia diba ita noho regena karaia lasi.

¹⁵ Gaukara Karaia Namonamo Bona mai Hemataurai Ida: Bema ita hegaegae namonamo, teritori dekenai taunimanima idia itaia diba hutuma badana do ita karaia lasi. Ruma taudia haida idia gari bema pablisa taudia momo be edia ruma vairanai idia itaia. Ita ura lasi idia laloa ita be edia noho gabuna lalonai ita “vareai.” Edena dala ai teritori do ita karaia be haroro hebou dekenai do ita herevalaia be namo. Teritori momo dekenai, sibona ita gimaia totona, bona inai be gau badana iseda taihu dekenai, pablisa taudia momo idia gaukara hebou be namo. Unai gaudia ita laloa be namo, to namona be grup taudia edia namba be ia hegeregere tadikaka ta ese ia naria, teritori idia karaia namonamo, bona iboudiai be idia haroro noho diba totona. Pablisa taudia momo lasi dainai ruma taudia do idia gari lasi, bona teritori idia karaia murinai, ia auka lasi ma teritori ta dekenai idia ia siaia lao totona.

¹⁶ Gaukara ita karaia namonamo karana ena anina ta be tama sina ese teritori dekenai idia haroro neganai, edia natudia edia kara idia naria namonamo. Namona be tadikaka badadia ida ruma dekenai idia lao neganai, natudia edia kara be namo. Namo lasi natudia be idia gadara eiava idia loaloa kava dainai ruma taudia eiava dala dekenai idia raka taudia be edia kara idia itaia bona idia laloa kerere.

¹⁷ Gau badana be haroro gaukara lalonai, ranu paraka ita inua eiava keru gabuna ai ita laga-ani negadia ita laloa namonamo. Iseda Basileia Gaukara pepana, June 1995, rau 3, ese ita ia hadibaia laga-ani latadia ese iseda haroro gaukara negana namona idia haorea kava diba. Momokani, ita ta ta ese loliwota ita hoia be sibona eda abia hidi. Nega bona moni idia naria namonamo totona, pablisa taudia haida idia ura kavabu ta mai ena ranu paraka idia abia lao haroro gaukara ai, bona edia ura hegeregerena idia inua.

¹⁸ Momo idia davaria bema idia be taunimanima idia noho gabudia​—dala, motuka atoa gabudia, maketi kahirakahira, bona ma gabu haida​—dekenai taunimanima idia hereva henia, anina namona idia havaraia. Unai gabudia dekenai ita ura ita haroro iseda hereva amo sibona lasi, to iseda lalo-maoromaoro karana amo danu. Kongregesen ta ta ibounai lalonai, pablisa taudia be edia teritori ena hetoana idia hanaia lasi be namo. Edia namba be maragi dainai, bisinesi gabuna ai idia raka loaloa taudia eiava bisinesi dekenai idia gaukara taudia do idia habadua lasi. Dala maorona ai bona mai hemataurai ida iseda haroro gaukara ita karaia totona, bema kongregesen ma ta ena Kongregesen Hesiai Komiti ese idia ita durua totona gaukara ia gwauraia lasi, namona be iseda teritori sibona lalonai ita gaukara.​—2 Korinto 10:​13-15 itaia.

¹⁹ Taoni badadia lalonai dala dekenai haroro gaukarana idia karaia diba gabudia be momo dainai, unai gabudia idia haria teritori idauidau dekenai. Bena teritori kadi ta pablisa tamona eiava haroro grup ta dekenai idia henia. Unai kara dainai teritori do idia karaia namonamo diba, bona pablisa momo be nega tamona gabu tamona ai do idia haroro lasi. Unai be 1 Korinto 14:40 ena hakaua herevana hegeregerena, ia gwau: “Gaukara ibounai umui karaia namonamo, mai dala maorona, karaia kava lasi.”

²⁰ Namona be nega ibounai hemataurai toana ita hahedinaraia, bona ia hamomokania ita be Iehova ena ladana ita abia isi taudia. Unai be mai anina ita gaukaralaia gaudia dekenai danu. Baege gunadia bona Baibel mirodia ese Basileia ena sivarai dekenai taunimanima edia lalona idia koua. Taunimanima haida idia gwau iseda dabua bona tauanina ena toana be “taunimanima dekenai idia hahedinaraia goevagoeva oi be daika, dahaka oi karaia, bona oi be mai emu dagi eiava.” Unai dainai, namo lasi iseda toana be dika eiava davana bada gaudia ita karaia, to namona be iseda toana be “Sivarai Namona ena dala hegeregerena.”​—Fil. 1:27; 1 Timoteo 2:​9, 10 itaia.

²¹ Korinto Ginigunana 9:26 dekenai, aposetolo Paulo ia gwau: “Lau heau maoromaoro, mai laloa tamona danu, lauegu heau dokona dekenai do lau ginidae totona. Lau be boksini tauna bamona lau paisia goadagoada, do lau uini totona. Hodahoda lau paisia lasi.” Paulo hegeregerena, iseda lalona ita hadaia mai anina haroro gaukara do ita karaia. Hari ita be Iehova ena “kwadi oreana” ida haroro gaukara ita karaia goadagoada neganai, namona be Keristani lalo-maoromaoro bona lalo-parara ita hahedinaraia, iseda teritori ai idia noho taudia iboudiai dekenai hahemauri sivaraina ita abia lao neganai.