Ruma Bese Taudia Idia Gaukara Hebou Dalana—Kongregesen Heboudia Totona
1 Keristani ruma besedia ese kongregesen heboudia dekenai idia lao ena oda herevana idia badinaia be gau badana. (Heb. 10:24, 25) Idia gaukara hebou namonamo neganai, iboudiai be hebou totona idia hegaegae, hebou dekenai idia lao, bona idia haere diba. Ruma bese ta ta edia mauri daladia be idauidau, bona herevana natudia be hida bona edia mauri lagani be idauidau, to Keristani tama ta, hereva momokani ia badinaia sina ta, eiava tama sibona o sina sibona ruma besena lalonai gau haida idia karaia diba, lauma gaudia dekenai ruma bese ia gaukara hebou totona.—Aon. 1:8.
2 Nega Umui Atoa Umui Hegaegae Totona: Ruma bese taudia idia gaukara hebou neganai, ta ta idia durua kongregesen hebou totona idia hegaegae namonamo diba. Momo be wiki ena Gima Kohorona Stadi idia stadilaia hebou. Ruma bese haida be Kongregesen Buka Stadi idia hegaegaelaia eiava wiki ena Baibel duahiduahi idia karaia hebou. Edia ura gauna be hebou dekenai idia do lao lasi neganai, hereva badadia be edia lalona dekenai idia atoa guna. Unai dala amo, idia ibounai ese idia kamonai gaudia amo namo do idia abia bona bema henanadai idia henia neganai, idia hegeregere do idia haere totona.—1 Tim. 4:15.
3 Umui Hegaegae Haere Totona: Namona be ruma bese taudia ta ta edia tahua gauna be, hebou dekenai ma haida vairanai edia helaro do idia gwauraia hedinarai. (Heb. 10:23) Ruma bese tauna ta be unai ia karaia totona heduru o hagoadaia herevadia ia abia be namo, a? Haroro Sikuli dekenai idia ta ta be hereva idia henia gwauraia neganai, edena bamona heduru idia abia be namo? Hahine taudia idia moale bema edia adavadia ese idia durua bona reana haheitalaia namona ta eiava edia hereva karaia dalana ta idia gwauraia. Namo lasi tama sina idia laloa idia ese natudia maragidia edia hereva do idia hegaegaelaia. Unai idia karaia neganai, natudia edia ura idia koua diba. To tama sina ese edia natudia maragidia idia durua diba bona hegaegae lalonai edia hereva idia duahia badabada neganai, tama sina idia kamonai diba.—Ef. 6:4.
4 Hebou Lao Totona Hegaegae: Natudia idia do maragi neganai tama sina ese idia hadibadia diba, edia dabua idia karaia bona idia hegaegae nega korikori ai hebou dekenai idia lao totona. Ruma bese taudia ta ta idia gaukara hebou diba ruma gaukara karaia totona, unai amo do idia leiti lasi.—Family Happiness bukana, rau 112, bona Memero Kekeni Edia Henanadai bukana, rau 316-17 lalonai idia noho heduru herevadia umui itaia.
5 Tama sina bona natudia ese idaunegai ia noho tauna, Iosua, ena hereva idia laloa dobu diba, ia gwau: “Lau, bona lauegu famili taudia, ai ese Lohiabada sibona ena hesiai gaukara do ai karaia.” Vadaeni, namona be emui lalona umui hadaia kongregesen heboudia dekenai lao totona do umui gaukara hebou.—Ios. 24:15.