April—Kara Namodia Karaia Goadagoada Negana!
1 Lai gubana be taunimanima momo idia noho gabuna dekenai ia mai noho neganai, taunimanima be dika idia davaria garina idia hadibadia haraga be gau badana. Lai gubana ia mai kahirakahira neganai, namona be mai hereva goada ida hadibaia hereva do idia hadibadia. Badina be dahaka? Badina be edia mauri do idia haboioa diba! Reana haida ese guna idia gwauraia hadibaia herevana idia kamonai lasi. Sedira haida idia kamonai to kara ta idia karaia lasi. Unai be momokani danu ita abia gaukarana dekenai; Dirava ena badu maoromaorona ena “lai guba” ese tanobada dikana ena kahana iboudiai ia do kokia lasi neganai ita be Dirava ena hadibaia herevana do ita harorolaia. (Aon. 10:25) Taunimanima bilioni momo be edia mauri idia haboioa diba! Dika ena sivarai idia hadibadia be namo. Namona be ita ese “kara namodia do ita karaia” goadagoada.—Tito 2:11-14.
2 Lagani momo lalodiai, Iehova ena bese taudia idia ura Memorial negana ai haroro gaukara idia karaia goadagoada. Hari lagani ai April hua ena Saturday bona Sunday iboudiai be ima. Unai hua lalonai dahaka do oi karaia? Oiemu kalenda dekenai April 2000 ai dahaka oi torea? Unai hua lalonai gaukara badana lauma dalana ai idia karaia neganai, namona be Iehova ena bese taudia ida kara namodia karaia hebou totona oi hegaegae.
3 Ai Ura Inai Do Ia Vara: Lagani 2000 ena dina badana be inai hua lalonai. Unai be April 19, Iesu ena mase laloatao dinana. Namona be ita gaukara goadagoada taunimanima momo be Memorial dekenai do idia mai totona. Hua gunanai ai hereva bamona, namona be Memorial dekenai idia ura idia mai taudia iboudiai ena lista oi torea bona ta oi laloaboio lasi. Namona be hari idia haroro lasi pablisa taudia, Baibel stiuden, lou henia taudia, guna idia stadi taudia, gaukara turadia, sikuli turadia, iseda dekena taudia, varavara, bona ita diba taudia ma haida ita boiridia. Idia ura idia mai taudia be mai edia motuka, a? Bema lasi, mai lalokau ida oi durudia diba? Memorial hanuaboina ai, iseda gaukara namona be ita ibounai be idia mai taudia iboudiai ita welkam henidia be namo. Memorial murinai, unai kamonai taudia be lauma dalana ai ita durudia diba.
4 Memorial vairana bona murina dinadia ai “kara namodia do ita karaia” neganai, unai be dala namona Iehova dekenai ita hahedinaraia ita dainai ia karaia gaudia iboudiai ita moalelaia momokani. Namona be ita ura iseda haroro gaukara ita habadaia. Bema heduru painia oi karaia, do oi hekwarahi bada hora 50 bona ma haida oi haroro. (Mat. 5:37) Hua ia matamaia neganai oi karaia sediual oi badinaia namonamo. (Had. 3:1; 1 Kor. 14:40) Namona be ita ibounai be painia taudia ita durudia, ita hagoadadia bona idia ida ita haroro hebou. (2 King Taudia 10:15, 16 itaia.) Bema mai goada ida April lalonai uhe ita hadoa, Iehova ena amo moale bada bona hahenamo momo do ita abia diba. (Mal. 3:10) Sedira unai be dala do ia kehoa, hanaihanai heduru painia eiava regula painia gaukara karaia totona. Namona be April lalonai lauma dalana ai ita abia gaukara namodia be murina hua lalodiai do ita karaia noho, Basileia pablisa gaukara ita karaia hanaihanai lalonai.
5 Momokani, Iehova ena bese taudia tausen momo be hari hua lalonai Baibel stadi ma haida do idia hamatamaia. Oi ura ta do oi hamatamaia, a? Namona be oi guriguri stadi ta oi hamatamaia totona, bona emu guriguri hegeregerena oi gaukara. Iehova be kudou namo tauna ta oi davaria bona hadibaia totona mai manau ida oi gwauraia noinoi dekenai do ia moale bada.—1 Ioa. 3:22.
6 Haroro gaukara ai momo be inai dala dekenai herevahereva namodia idia hamatamaia. Oi henanadai henia guna: “Hari inai negai uhau momo be taravatu utua karadia mai dagedage danu idia karaia; oi laloa inai be demoni edia gaukara dainai eiava tama sina ese idia matahakani henidia lasi dainai?” Oi naria ia haere totona. Bema ruma tauna ia gwau “demoni edia gaukara,” Apokalupo 12:9, 12 oi duahia, bona Diabolo ena gaukara oi herevalaia, ia ese tanobada lalonai heiriheiri badana ia havaraia. Dahaka Ita Karaia? buklet oi kehoa Kahana 4 dekenai, bona ruma tauna oi nanadaia, ia laloa Diabolo be edeseni amo ia mai. Namona be paragraf ginigunadia rua oi duahia bona oi herevalaia. Bema ruma tauna ia laloa “tama sina ese idia matahakani henidia lasi” dainai iseda noho gabuna dekenai dagedage be momo, 2 Timoteo 3:1-3 oi duahia bona inai hekwakwanai idia havaraia karadia oi herevalaia. Bena Dahaka Ita Karaia? buklet oi kehoa Kahana 8 dekenai, paragraf 5 oi duahia, bona umui herevahereva noho. Bema oi lou henia diba, sedira unai ese dala ia kehoa unai tauna dekenai Baibel stadi oi henia noho totona. Oi vadivadi henia lou neganai, oi nanadaia bema ia diba tauna ma ta be ia dibaia gaudia danu ia ura kamonai.
7 April lalonai “kara namodia do ita karaia” dalana ma ta be gabu bona nega idauidau ai haroro gaukara karaia. Uma gabuna ta ai eiava motuka idia atoa gabuna ai haroro gaukara oi laloa, a? PMV naria gabuna ai eiava peleini gabuna dekenai, a? Eiava oi ura telefon amo oi haroro, eiava dala dekenai, eiava bisinesi teritori dekenai? Hari hua lalonai unai lalohadai oi hagugurua be namo, ani? Iehova ese oi do ia durua gari lasi dekenai oi karaia totona. (Kara 4:31; 1 Tes. 2:2b) Sedira unai haroro gaukara daladia idauidau dekenai ia manada painia ta ida eiava pablisa ta ida nega oi makaia umui gaukara hebou totona.
8 Bema ta ia ura iena haroro gaukara ia habadaia do ia ura gabu bona nega idauidau ai haroro gaukara ia karaia. Nega momo ma ta ida turana bamona ita kiki hebou matamaia karana amo ita karaia diba. Taunimanima momo idia laloa herevana ta oi gwauraia, sedira paragraf 6 lalonai ai gwauraia hereva dalana oi karaia diba. Namona be idia boio kava diba miniti haida oi gaukaralaia namonamo. Ita be 5 toea, 10 toea, eiava 20 toea ita negea kava lasi idia be K1 lasi dainai. Miniti 5, miniti 10, eiava miniti 15 ita gaukaralaia gabu bona nega idauidau ai ita haroro totona be namo, ani?
9 Guna Gaudia Laloa Negana: Lagani gunana ai “Dirava Ena Peroveta Herevana” Distrik Hebouhebouna ai drama lalonai idia hahedinaraia herevadia oi laloa. Unai drama, ladana Iseda Ahuna Lauma Dalanai Ita Laloa Bada, ena hereva dainai Iakobo bona Esau idia idau dalana ita laloa namonamo. Esau ia gwau ia be Iakobo bamona lauma gaudia ia laloa, to iena kara ese unai ia hahedinaraia lasi. (Gen. 25:29-34) Unai be sisiba mai siahuna ita dekenai! Iakobo bamona, namona be Iehova ena hahenamo abia totona ita hekwarahi, ita rosia helulu danu. (Gen. 32:24-29) Namona be April bona unai murinai hua lalodiai iseda gaukara goadagoada karana ita hamatamaia lou, namo lasi iseda ahuna lauma dalana ai be anina lasi gauna bamona ita laloa.
10 “Lohiabada ena dina badana be ia kahirakahira vadaeni inai. Ia be ia mai noho haraga.” (Sep. 1:14) Namona be Basileia ena sivarai namona do ita boiboilaia. Taunimanima be edia mauri do idia haboioa diba! Namona be inai hua lalonai Iehova ena bese taudia be hahenamo momo do idia abia, lalo-tamona ai ‘kara namodia ita karaia’ hebou lalonai.
[Box on page 4]
Memorial Ena Hereva Haida
Hari lagani ena Memorial be Wednesday, April 19 ai do ita karaia. Namona be elda taudia ese inai gaudia idia hegaegaelaia:
◼ Hebou ena nega umui hegaegaelaia neganai, namona be umui laloatao paraoa bona uaina umui henia lasi ela bona dina ia diho.
◼ Iboudiai, hereva ia henia tadikakana danu, ese Memorial ena nega bona do umui hebou gabuna idia diba be namo.
◼ Paraoa bona uaina maorona umui hegaegaelaia.—March 1, 1985, Gima Kohorona, rau 19 itaia.
◼ Hebou ia do hamatamaia lasi neganai, mereki, galasi, bona pata koua dabua namona umui atoa namonamo.
◼ Nega ia do noho lalonai, Kingdom Hall eiava do umui hebou gabuna umui hagoevaia namonamo.
◼ Atendan taudia bona uaina bona paraoa henia taudia umui abia hidi guna bona idia umui hadibadia dahaka do idia karaia bona karaia dalana kikilaia.
◼ Bema Kingdom Hall tamona lalonai Memorial heboudia haida do umui karaia, namona be kongregesen ta ta ese edia nega idia abia hidi namonamo, unai amo Kingdom Hall vareai gabuna, dala, bona motuka atoa gabudia ai taunimanima be vareai bona raka lasi totona do idia hekwarahi lasi.