Henanadai Mauana
◼ Edena dala ai atendan taudia ese tama sina idia durua diba, edia natudia be hebou dekenai kara namo idia hahedinaraia totona?
Natudia edia tauanina idia goada, idia manada lasi nega daudau idia helai totona. Hebou murinai, natudia edia goada ia do noho dainai reana idia ura heau bona natudia ma haida idia lulua Kingdom Hall lalonai eiava hebou gabudia ma haida dekenai, motuka atoa gabuna, eiava taunimanima idia raka gabudia dekenai. To, aonega herevana ia gwau bamona, “sibona ena ura ia karaia noho merona ese, iena sinana do ia hahemaraia.”—Aon. 29:15.
Sibona edia namo bona ma haida ese dika idia davaria lasi totona, namona be natudia be Kingdom Hall lalonai eiava murinai idia heau bona gadara lasi. Madi, bema natuna ta be ia heau dainai buruka tadikaka eiava taihu ta ia moru bona bero bada herea ia davaria. Unai ese hisihisi ia havaraia kava bona reana tama sina bona kongregesen ese moni idia negea kava.
Baibel ese ia gwauraia hegeregerena tama sina be mai edia maduna edia natudia idia hadibaia, iseda tomadiho gabuna do idia matauraia totona. (Had. 5:1a) Iseda Keristani hebou, bona sekit bona distrik hebouhebou dekenai, atendan taudia idia itaia gau iboudiai idia heau “namonamo” bona “maoromaoro.” (1 Kor. 14:40; Kol. 2:5) Atendan taudia be Kingdom Hall lalonai bona murinai, program vairanai, lalonai, bona murinai idia gima noho. Bema natuna ta ia heau loaloa eiava ia gwau-edeede, atendan tauna be mai hebogahisi ida unai natuna ia hadokoa diba, bona unai natuna dekenai ia gwauraia hedinaraia diba dahaka dainai ia karaia karana be ia maoro lasi. Mai hemataurai ida unai natuna ena tama eiava sina dekenai unai hekwakwanai ia gwauraia danu, bona ia hamaoroa natuna idia naria be namo. Unai tama eiava sina be dala maorona ai ia kara be namo.
Ita diba nega haida hebou lalonai beibi bona natudia maragidia idia tai eiava idia helai namonamo lasi. Atendan taudia be miniti 20 hebou vairanai, program ia do matamaia lasi neganai, idia ginidae bona hebou rumana ena dokona kahana dekenai idia noho helai gaudia be tama sina mai edia natudia matamata totona idia makaia diba. Namona be ita ibounai ita durua heheni bona unai helai gaudia ita rakatania idia totona.
Bema natuna ta ia helai namonamo lasi, namona be tama eiava sina ese kara ta ia karaia be namo. Bema tama eiava sina ese kara ta ia karaia lasi bona unai natuna ena kara ese haida edia kamonai karana ia hadikaia, atendan ta ese mai hemataurai ida unai tama eiava sina ia noia natuna be hebou rumana amo do ia abia lao murimuri ai. Bema kamonai matamata taudia bona edia natudia maragi be hebou dekenai ita boiria mai, namona be idia ida ita helai bona ita durua bema edia natudia idia tai eiava dala haida ai hebou idia hadikaia.
Kingdom Hall dekenai lagani idauidau natudia ita itaia bona Dirava ena ruma bese lalonai edia kara namodia ita itaia neganai ita moale. (1 Tim. 3:15) Iehova ese tomadiho totona ia kehoa dalana idia matauraia neganai, ia do idia hanamoa bona kongregesen taudia ibounai ese unai matamata taudia do idia moalelaia.
This article is repeated in km 7/06.