‘Bema Hadibaia Tauna be Lasi, Edena Bamona Lau Diba?’
1 Evanelia tauna Filipo ese Etiopia eunuko tauna ia nanadaia bema Dirava ena Hereva amo ia duahia gaudia ia lalo-pararalaia, unai tauna ia haere, ia gwau: ‘Bema hadibaia tauna be lasi, edena bamona lau diba?’ Filipo be mai ena moale ida unai tauna ia durua Iesu ena sivarai namona ia lalo-pararalaia totona, bona unai kara dainai maoromaoro ia bapatiso. (Kara 8:26-38) Filipo ese Keriso ena hahegani ia badinaia, ia gwau ‘bese ibounai be diba tahua taudia do umui halaoa, do umui bapatiso henia bona idia do umui hadibaia.’—Mat. 28:19, 20.
2 Namona be unai hahegani ita badinaia bona taunimanima be hahediba taudia ai ita halaoa, Filipo ese ia karaia hegeregerena. To, Etiopia eunuko tauna be lauma dalanai ia tubu haraga karana be nega momo Baibel amo ita stadi henia taudia dekenai ita itaia lasi. Unai tauna, Iuda tomadiho ia abia dae bona Baibel ia diba momo tauna, be mai ena kamonai kudouna bona ma kara tamona sibona do ia karaia be namo, namona be do ia abia dae Iesu be gwauhamata Mesia. Ita stadi henia taudia bema Baibel idia diba lasi, tomadiho koikoi edia hahediba koikoi herevadia ese idia hakaua kerere, eiava sibona edia hekwakwanai ese idia hametaua, unai be hekwarahi gauna. Baibel stiuden taudia ita hakaua lao gwauhamata bona bapatiso idia abia totona lalonai, dahaka ese ita ia durua diba ita kwalimu totona?
3 Baibel Stiuden Tauna Ena Ura Lauma Gaudia Dekenai Ita Diba be Namo: August 1998 Iseda Basileia Gaukara lalonai idia udaia pepana ese Dahaka Ita Karaia? buklet bona Diba bukana amo taunimanima ita stadi henia totona ita gaukaralaia nega ena lata ia herevalaia. Inai dala ia hahedinaraia: “Gau badana be stiuden tauna ena noho dalana bona ena diba hegeregerena ena stadi ita karaia. . . . To, namo lasi ita ura stadi ita haorea haraga dainai iseda stiuden tauna be Baibel ena hereva momokani ia lalo-pararalaia namonamo lasi. Namona be stiuden taudia iboudiai edia abidadama matamatana be badina aukana latanai idia haginia.” Unai dainai, namo lasi ita laloa hua 6 lalonai Diba bukana do ita haorea be namo bena stadi ita karaia haraga. Hua 6 be reana hegeregere lasi haida ita durua idia goada idia lao bena bapatiso idia abia totona. Pura ta ta lalonai stadi oi karaia neganai, nega oi atoa stiuden tauna ese Dirava ena Hereva lalonai ia dibaia gaudia ia lalo-pararalaia bona ia abia dae totona. Nega haida, reana pura rua eiava toi be Diba bukana ena karoa tamona oi karaia totona do oi atoa. Unai ese nega ia henia idia torea lasi Baibel siridia umui duahia bona edia anina oi hahedinaraia namonamo totona.—Roma 12:2.
4 To, edena bamona bema Diba bukana umui haorea, bona oi itaia stiuden tauna ena lalo-parara hereva momokani dekenai do ia habadaia be namo eiava ia do hegeregere lasi hereva momokani ena kahanai ia gini goada bona ena mauri be Dirava dekenai ia gwauhamatalaia totona? (1 Kor. 14:20) Dahaka gaudia ma haida oi karaia diba mauri ena dala dekenai ia oi hakaua totona?—Mat. 7:14.
5 Baibel Stiuden Tauna Ena Ura Lauma Gaudia Dekenai Oi Hagugurua: Bema oi itaia unai tauna be ia goada ia lao, ena be unai ia karaia metairametaira, bona ia dibaia gaudia ia moalelaia, namona be Dahaka Ita Karaia? buklet bona Diba bukana umui haorea murinai, Baibel stadi be buka iharuana dekenai oi karaia noho. Baibel stadi ibounai dekenai reana unai oi karaia lasi, to oi karaia be namo neganai, Maino bukana, Tomadiho bukana, eiava Dirava Ena Hereva bukana dekenai stadi oi karaia noho. Pablisa momo dekenai unai buka idia noho bema kongregesen lalonai idia noho lasi. Unai buka be umui oda diba danu. To, Dahaka Ita Karaia? buklet bona Diba bukana ita stadilaia guna be namo. Unai Baibel stadi, lou henia, bona ita gaukaralaia nega ita ripotilaia, ena be stiuden tauna be buka iharuana ia do haorea lasi neganai bapatiso ia abia.
6 Unai ena anina be vanegai sibona bapatiso idia abia to buka tamona sibona idia stadi taudia be heduru do idia abia lou diba buka iharuana idia stadilaia totona, a? Reana lasi. To, reana idia manoka eiava hereva momokani dekenai reana idia goada idia lao lasi, bona reana idia laloa heduru idia abia be namo hereva momokani be edia mauri lalonai do idia badinaia momokani totona. Bapatiso pablisa ida stadi ita hamatamaia lou totona, namona be haroro naria tauna ita itaia guna. To, bema guna Diba bukana idia stadi taudia haida oi diba to idia goada idia lao lasi bona gwauhamata bona bapatiso idia abia lasi, reana oi ura idia oi itaia bema idia ura Baibel stadi idia karaia lou.
7 Keristani lalokau ena toana ta be, ita stadi henia kamonai taudia ta ta ita durua bona laloa bada. Iseda tahua gauna be ita ura stiuden tauna ita durua Dirava ena Hereva momokani dekenai lalo-parara bada do ia abia. Bena mai ena diba ida hereva momokani ena kahanai ia gini goada, Iehova dekenai ena mauri ia gwauhamatalaia, bona unai ia hahedinaraia totona ranu bapatiso ia abia diba.—Sal. 40:8; Ef. 3:17-19.
8 Oi laloatao dahaka ia vara Etiopia eunuko tauna ia bapatiso murinai? “Ena dala dekenai ia lao, mai moale danu” Iesu Keriso ena hahediba tauna matamatana hegeregerena. (Kara 8:39, 40) Namona be ita, bona mai kwalimu ida hereva momokani ena dala dekenai ita hakaua taudia ese moale bada ita abia Iehova Dirava hesiai henia karana dekenai—hari bona hanaihanai!