Henanadai Mauana

◼ Hereva henia tauna ese siri ia gwauraia neganai, dahaka dainai helai taudia ese edia Baibel amo siri idia itaia be namo?

Hereva henia tauna ese dahaka do ia herevalaia bona ena hereva lalonai Dirava ena Hereva ena kahana amo siri ta ta do ia herevalaia eiava lasi amo do ia diba helai taudia dekenai siri hida do ia gwauraia.

Gau badana be ita laloatao Baibel ena siri ita duahia karana ena badina ta be ita ura hamomokania ia herevalaia gaudia be Baibel amo. (Kara 17:11) Badina ma ta be, ia ura helai taudia dekenai edia lalona ia veria Baibel siridia amo ia herevalaia gauna ia hamomokania bona unai amo ibounai edia abidadama do ia hagoadaia. Ia ese Baibel ena siri ia duahia neganai helai taudia be sibona edia Baibel amo unai idia itaia karana ese idia ia durua unai gauna idia laloatao namonamo totona. Danu, siri idia duahia lalonai, nouti idia torea bona ia herevalaia gaudia idia laloa namonamo ena namo be bada.

Society ena autlain lalonai siri haida idia torea, bona unai be hereva henia tauna ese ena hereva ia hegaegaelaia neganai ia do idia durua totona. Idia ese diba ma haida idia henia diba bona ia idia durua Baibel ena mai anina bada hakaua herevadia ia laloa namonamo totona bona ia herevalaia gauna ia lalo-pararalaia namonamo totona. Hereva henia tauna ese ia laloa edena siri be mai anina bada ia herevalaia gauna dekenai bona helai taudia ia boiria, ia duahia neganai edia Baibel amo do idia itaia. Ena hereva idia durua siridia ma haida be ia gwauraia diba bona ia herevalaia sibona, unai negadia ai helai taudia be edia Baibel amo idia itaia lasi be hegeregere.

Hereva henia tauna ese siri ia duahia negadiai, Baibel amo ia duahia, kompiuta amo ia printaia pepana amo lasi. Helai taudia ia noia edia Baibel amo do idia duahia neganai, hereva henia tauna ese Baibel buka, karoa, bona siri (dia) ia gwauraia goevagoeva. Sisina ia naria lalonai, henanadai ta ia henia eiava unai siri do idia duahia ena badina ia gwauraia, unai amo helai taudia dekenai nega ia henia unai siri idia davaria diba totona. Unai siri ia gwauraia lou karana ese helai taudia ia durua danu idia laloatao totona. To, rau ena namba ia gwauraia lasi be namo, badina reana helai taudia idia gaukaralaia Baibel haida edia rau be idauidau. Hereva henia tauna ese Baibel ena siri ia gwauraia bena helai taudia ese idia itaia karana amo idia ia durua Dirava ena Hereva ena siahu amo namo do idia davaria.​—Heb. 4:12.