Haroro Noho!
1 Dirava ena ura be “taunimanima ibounai ese mauri do idia davaria, bona hereva momokani do idia diba.” (1 Tim. 2:4) Unai dainai, ita dekenai sivarai namona harorolaia gaukarana ia henia. (Mat. 24:14) Bema ita haroro noho ena badina ita laloa bada, lalona hamanokaia herevadia eiava lalona veria gaudia ese ita do idia koua lasi.
2 Dahaka Dainai Ita Haroro Noho? Tanobada dekenai, lalona veria gaudia be momo dainai, taunimanima ese iseda hereva idia laloaboio eiava idia laloa bada lasi. Unai dainai, Dirava ena hahemauri sivaraina be idia dekenai ita hadibaia noho be namo. (Mat. 24:38, 39) Danu, taunimanima edia mauri lalonai idia vara gaudia be nega ibounai idia idau. Tanobada dekenai idia vara gaudia danu idia idau haraga diba. (1 Kor. 7:31) Kerukeru, pura vaira, eiava hua vaira dekenai, ita haroro henia taudia be reana hekwakwanai eiava lalo-hekwarahi gaudia matamatadia idia davaria dainai ita mailaia sivarai namona do idia laloa bada. Oi dekenai hereva momokani ia mailaia Witnes tauna be ia mai loulou dainai oi moale, ani?
3 Dirava Ena Hebogahisi Tohotohoa Totona: Iehova be mai ena haheauka ida kara dika taudia ia do hahemaoro henia lasi neganai, nega ia henidia. Ita amo kudou-maoro taudia ia do hagoadaia noho ia dekenai do idia giroa bona do idia mauri totona. (2 Pet. 3:9) Rara dekenai do ita kerere bema Dirava ena hebogahisi sivaraina be taunimanima dekenai ita gwauraia lasi bona bema ita hamaorodia lasi Dirava ese edia kara dika amo idia helalo-kerehai lasi taudia do ia hahemaoro henia. (Esek. 33:1-11) Ena be nega momo iseda haroro gaukara idia abia dae lasi, to namona be ita hesiku lasi lalo-momokani taudia ita durua Dirava ena hebogahisi bada idia diba totona.—Kara 20:26, 27; Roma 12:11.
4 Iseda Lalokau Hahedinaraia Totona: Iehova Dirava be Iesu Keriso amo hahegani ia henia sivarai namona be tanobada ibounai dekenai do idia harorolaia totona. (Mat. 28:19, 20) Ena be taunimanima idia kamonai lasi, to kara maoromaoro ita karaia noho amo iseda lalokau bona badinaia karana be Dirava dekenai ita hahedinaraia diba.—1 Ioa. 5:3.
5 Namona be iseda lalona ita hadaia do ita haroro noho! Iehova ena “hahemauri dinana” ia do noho lalonai, namona be do ita karaia goadagoada noho.—2 Kor. 6:2, NW.