Oi Kamonai Namonamo
1 Ita kamonai namonamo totona iseda kara ita biagua be namo. Namona be kamonai tauna ia ura diba do ia abia bona ia kamonai gaudia amo namo do ia davaria. Unai dainai, Iesu ia gwau “umui emui kamonai do umui naria namonamo.”—Luka 8:18.
2 Kongregesen heboudia, sekit bona distrik hebouheboudia ita lao henia neganai, unai be gau badana. Unai negadia lalonai ita kamonai namonamo be gau badana. (Heb. 2:1) Iniseniai be hereva haida Keristani heboudia dekenai do oi kamonai namonamo totona oi idia durua.
◼ Hebouhebou edia namo oi laloa bada. Unai be dala badadia Iehova ese “kohu naria tauna mai ena kamonai” amo ita ia “hadibaia” totona.—Isa. 54:13; Luka 12:42.
◼ Hegaegae guna. Do umui herevalaia herevana oi itaia, bona oiemu Baibel bona hebou dekenai do umui stadilaia bukana oi abia mai.
◼ Hebou lalodiai, oi hekwarahi oi laloa namonamo totona. Oi ida idia helai taudia oi hereva henidia lasi bona helai taudia ma haida ese idia karaia karadia oi itaia lasi. Oi naria namonamo, hebou murinai dahaka do oi karaia eiava sibona emu gaudia ma haida ese emu lalona idia veria garina.
◼ Idia herevalaia gaudia oi laloa namonamo. Sibona oi nanadaia: ‘Inai hereva ena anina lau dekenai be dahaka? Edena negai do lau badinaia?’
◼ Hereva badadia bona Baibel siridia oi toredia. Unai ese oi do ia durua idia herevalaia gaudia do oi laloa bona do oi laloatao totona, bena hereva badadia be gabeai do oi gaukaralaia diba.
3 Emui Natudia Umui Hadibaia Do Idia Kamonai Totona: Natudia be lauma dalanai umui hadibaia be namo. (Deut. 31:12) Idaunegai, Dirava ena taunimanima dekenai Taravatu idia duahia neganai, idia kamonai gaudia idia lalo-pararalaia diba taudia be idia kamonai namonamo be gau badana. (Neh. 8:1-3, NW ) Bema tama sina be hebou lalonai idia noho bona idia kamonai namonamo, edia natudia danu unai bamona do idia karaia. Natudia hamoalea totona gadara gaudia eiava edia laulau idia kala diba bukadia umui abia mai be aonega karana lasi. Mei rumana lao henia kava karana ese edia kamonai karana do ia hadikaia danu. “Natuna maragidia ibounai ese kavakava idia karaia noho” dainai, namona be tama sina idia hekwarahi edia natudia idia helai namonamo bona idia kamonai namonamo totona.—Aon. 22:15.
4 Ita kamonai namonamo karana amo, ita hamomokania ita aonega momokani bona ita ura iseda ‘diba do ita habadaia.’—Aon. 1:5.