“Harihari Gaudia Taunimanima Dekenai” be mai Edia Ura ida Dirava Ena Mamoe Idia Naria
1 Iehova ese mai ena lalokau ida ena Natuna amo dala ia karaia “harihari gaudia” bamona tatau haida ia henia! (Efe. 4:8, 11, 12) Idia be mai edia maduna momo, hegeregere mai edia goada bona ura ida Dirava ena mamoe idia naria. (1 Pet. 5:2, 3) Ita ibounai ese inai taudia amo namo ita abia. Herevana haida be metau idia davaria, hari sibona kongregesen idia bamoa, mai edia manoka, eiava idia raka oho vadaeni, inai tatau ese unai taudia ibounai edia namo lauma dalanai idia laloa bada.—Fili. 2:4; 1 Tes. 5:12-14.
2 Tanobada ai idia vara gaudia ese gari idia havaraia neganai, unai naria taudia be “lai koua gabuna hegeregere do idia lao. Idia be guba bada ia toa neganai hunia gabudia namodia hegeregere.” Ita hesiku eiava tanobada ena lalo-hekwarahi ese ita idia hametaua, eiava heduru ita ura abia neganai, ita idia hagoadaia, “tano kaukau gabudia lalonai sinavai maragidia hegeregere” eiava “nadi badana ena ikerukeru bamona, tano kaukau dekenai.”—Isa. 32:2.
3 Haroro Lasi Taudia Hagoadaia: Elda taudia idia hekwarahi idia haroro nega ta ta eiava idia haroro lasi taudia idia hagoadaia, bona idia durudia kongregesen ena gaukara idauidau idia karaia lou totona. Mai lalokau ida idia karaia mamoe vadivadi gaukarana ese momo ia durudia vadaeni kongregesen heboudia idia lao henia hanaihanai totona bona lauma dalanai idia goada dainai haroro gaukara idia karaia lou. Elda taudia edia hekwarahi ese Iehova ena lalokau henari karana bona Iesu Keriso ena hakaua siahuna ia hahedinaraia. Iena mamoe ta ia raka siri o boio neganai unai bamona laloa bada karana ena dala ia hahedinaraia.—Mat. 18:12-14; Ioa. 10:16, 27-29.
4 Unai mamoe naria taudia be toa haida idia tahua, lauma dalanai haida idia raka namonamo lasi neganai unai idia hedinarai. Bema ta be toa haida ia hahedinaraia, hegeregere ia lalo-manoka, hebou dekenai nega ta ta sibona ia mai, eiava haroro gaukara ia karaia momo lasi, lauma dalanai heduru ia abia be namo. Ta be tanobada ena dabua bona tauanina ena toana ia hahedinaraia eiava kongregesen ia maumauraia matamaia, elda taudia ese mai edia ura ida heduru idia henia. Elda taudia be mai momokani bona hebogahisi ida idia ura ‘edia mauri idia atoa diho’ unai bamona taudia idia durua edia lalokau Iehova dekenai idia hahedinaraia lou totona.—1 Tes. 2:8.
5 Guna, gwauhamata Keristani taudia haida ese kongregesen idia bamoa noho lasi, bona lauma dalanai idia manoka badina gorere idauidau, moni ena hekwakwanai, bona ruma bese ena metau idauidau ese ia hametaudia. Elda taudia idia maumau lasi, to mai edia hebogahisi ida unai taudia idia hagoadaia Iehova ese ena mamoe iboudiai ia naria bona nega aukadia lalonai idia do ia durua. (Sal. 55:22; 1 Pet. 5:7) Idia gima mamoe naria taudia ese mamoe idia durua idia lalo-parara totona, bema idia ese ‘Dirava dekenai idia raka kahirakahira lao, vadaeni ia ese idia dekenai do ia raka kahirakahira mai’ bona idia do ia hagoadaia.—Iam. 4:8; Sal. 23:3, 4.
6 Tauanina Manoka Taudia Idia Laloa Bada: Unai mamoe naria taudia mai edia lalokau ese reana ma haida idia laloa lasi taudia idia lalodia danu. Kongregesen ibounai dekenai, idia lao taudia haida be idia buruka eiava edia tauanina be mai ena dika ma ta. Edia noho dalana dainai, Basileia ena sivarai idia harorolaia badabada lasi. To herevana dahaka idia karaia, idia ese haroro gaukara idia durua bada. (Mat. 25:15) Ena be miniti 15 sibona idia haroro, to namona be unai idia ripotilaia, unai amo idia be hanaihanai Basileia harorolaia taudia.
7 Unai “harihari gaudia” bamona tatau ese inai nega ai—Memorial negana ai—edia tadikaka ese lauma dalanai idia abia be namo gaudia idia laloa bada. Unai be nega namona elda taudia idia hekwarahi idia raka oho taudia idia durua, kongregesen bamoa karana ena moale bona lalo-maino idia mamia lou totona! Unai bamona taudia, ita danu ‘Keriso idia abidadama henia taudia,’ ese kongregesen heboudia bona haroro gaukara dekenai idia mai, bona mauri davalaia boubouna dekenai edia abidadama idia hamomokania lou ita itaia be moale gauna.—Gal. 6:10; Luka 15:4-7; Ioa. 10:11, 14.