Basileia Harorolaia Gaukarana ese Taunimanima Ia Hamauria Diba!
1 Ia be hari tanobada hegegemadai idia karaia gaukarana badana. Iehova Dirava, Iesu Keriso, bona aneru milioni momo ese unai gaukara idia laloa bada. Dahaka gaukara, bona dahaka dainai ia be mai anina bada? Ia be Basileia harorolaia gaukarana, bona ia ese taunimanima ia hamauria diba!—Roma 1:16; 10:13, 14.
2 Taunimanima haida idia laloa inai tanobada ita hanamoa karana be ma haida durua karana badana. Taunimanima momo idia hekwarahi maino idia havaraia, gorere idia hanamoa, bona moni ena hekwarahi idia haorea totona. To dahaka ese taunimanima ia durua bada?
3 Mai Anina Bada Gaukarana: Basileia harorolaia gaukarana sibona ese mauri ena anina, taunimanima edia hisihisi ena badina, bona ita abidadama henia diba helaro tamona vaira negana totona ia hahedinaraia. Sivarai namona ese taunimanima ia durua Iehova ena turana ai idia lao bona ia amo maino idia abia totona, bona unai “Dirava ena maino ese taunimanima edia diba ia hanaia momokani.” (Fili. 4:7) Basileia sivaraina sibona ese hari mauri lalonai idia vara hekwakwanai hanaia totona hakaua herevadia ia henia bona inai tanobada dikana do ia ore negana amo hahemauri ita abia dalana ia hahedinaraia. (1 Ioa. 2:17) Unai dainai Basileia ita harorolaia goadagoada be maoro, ani?
4 Haheitalai ta be inai: Kahirakahira ranu haboua gabuna do ia makohi bona hanua ese dika ia davaria gwauraia neganai, idia mahuta hanua taudia durua dalana namona be dahaka? Ena haba idia manoka ranu haboua gabuna amo ranu ita seia oho, a? Do ia dika hanuana ita hahairaia, a? Lasi! Hanua taudia ita hanogaia, ita hadibaia dika do ia vara, bona idia heau mauri totona heduru ita henia! Hari lauma dalanai idia mahuta noho taudia ese dika bada idia davaria gwauraia. (Luka 21:34-36) Inai tanobada ena oromana dikana be kahirakahira do ia ore dainai, ita haroro goadagoada noho be gau badana!—2 Tim. 4:2; 2 Pet. 3:11, 12.
5 Oi Haroro Noho: Namona be dala ita tahua kudou-maoro taudia momo dekenai sivarai namona ita harorolaia totona—edia ruma ai, dala ai, telefon amo, bona nega bona gabu idauidau dekenai. Iehova ese ita dekenai ia henia gaukarana ese gaukara ma haida ia hereaia. Bema mai ura bada ida ita karaia noho, ‘ita ese mauri do ita davaria bona ita idia kamonai taudia danu.’—1 Tim. 4:16.