Henanadai Mauana

◼ Dibura taudia ita haroro henia neganai, dahaka sisiba herevadia ita badinaia be gau badana?

Tanobada hegegemadai dibura taudia milioni 8 idia noho, idia haida be sivarai namona idia ura henia. (1 Tim. 2:4) Brens opesi ta be hua ta ta lalonai, dibura taudia bona edia ruma bese taudia amo revareva 1,400 mai kahana idia davaria, buka bona magasin bona idia vadivadi henidia totona idia noinoi. Ena be dibura taudia momo be mai momokani ida edia ura idia hahedinaraia, to sivarai haida ese idia hahedinaraia haida be idia koikoi, idia ura Dirava ena taunimanima be koikoi dalanai idia gaukaralaia. Unai dainai, dibura taudia ita haroro henia neganai, ita ibounai ese inai sisiba herevadia ita badinaia be gau badana.

Nega momo dibura taudia be revareva amo idia haroro henidia. Taihu taudia ese dibura tatau do idia tore henia lasi be gau badana, ena be idia ura lauma dalanai idia durua. Unai maduna be manada tadikakadia sibodia ese idia karaia be namo. Idia manada taihudia idia abia hidi mai momokani ida Baibel ena hereva momokani idia ura kamonai dibura rumadia dekenai idia noho hahine idia tore henia totona. Dibura taudia dekenai moni eiava harihari gaudia idia siaia lasi, ena be unai gaudia idia noia.

Bema dibura tauna ia hahedinaraia sivarai namona ia ura henia, namona be iena ladana bona adres be dibura gabuna kahirakahira ia noho kongregesen dekenai idia henia. Nega momo unuseni idia noho manada tadikakadia be do idia vara diba gaudia hamaoromaoroa daladia idia diba. Bema kongregesen ta ia noho lasi, dibura tauna ena ladana bona adres be brens opesi dekenai idia siaia be namo.

Ia kerere lasi bema idia abia hidi tadikakadia be dibura taudia ida hebou idia karaia, unai amo ma haida be nega tamona do idia stadi. To, ma nega haida dekenai, namo lasi pablisa taudia be dibura rumadia lalonai dibura taudia ida idia hebamo kava. Danu, pablisa taudia ese dibura rumana idia vadivadi henia kava bona dibura taudia idia bamoa lasi.

Sivarai namona be dibura taudia danu ita herevalaia neganai, namona be ‘ita aonega, gaigai bamona, bona ita dagedage lasi, pune manu bamona.’​​—Mat. 10:16.