Manau be Dabua Bamona Umui Atoa
1 Mamoe naria merona be Iehova ia tabekau henia bona tuari tauna goadana ia halusia. (1 Sam. 17:45-47) Taga tauna ta be mai manau ida hisihisi ia haheaukalaia. (Iobu 1:20-22; 2:9, 10) Dirava ena Natuna be ena hadibaia hereva dainai ia abia hanamoa ibounai be iena Tamana dekenai ia henia. (Ioa. 7:15-18; 8:28) Unai haheitalai ta ta lalonai manau be mai anina bada. Unai hegeregerena, hari ita davaria hekwakwanai lalonai manau karana be gau badana.—Kol. 3:12.
2 Haroro Neganai: Ita be Keristani hesiai taudia dainai, mai manau ida taunimanima idauidau dekenai sivarai namona ita herevalaia, edia kopina kala, kastom, eiava mauri dalana dainai ita hahemaoro henidia haraga lasi. (1 Kor. 9:22, 23) Bema haida be ita idia matauraia lasi eiava mai hekokoroku ida Basileia ena sivarai idia dadaraia, ita badu eiava hereva auka lasi to mai manau ida kara namo taudia ita tahua. (Mat. 10:11, 14) Iseda diba eiava edukeisen amo ma haida edia lalona ita veria toho lasi, to ita diba Dirava ena Hereva ena lalona veria siahuna ese iseda hereva ibounai ia hereaia dainai, unai ita gaukaralaia. (1 Kor. 2:1-5; Heb. 4:12) Iesu ita tohotohoa, hanamoa ibounai be Iehova dekenai ita henia.—Mar. 10:17, 18.
3 Kongregesen Lalonai: Keristani taudia be ‘idia laloa manau, vadaeni ta ta dekenai durua do idia henia’ be namo. (1 Pet. 5:5) Bema ita laloa ma haida ese ita idia hereaia, dala do ita tahua iseda tadikaka ita durua totona, idia ese ita idia durua totona lasi. (Ioa. 13:12-17; Fili. 2:3, 4) Namo lasi ita laloa ma haida ita hereaia dainai Kingdom Hall hagoevaia gaukarana ita karaia diba lasi.
4 Manau karana ese ita ia durua bema ‘haida ese metau ita dekenai idia henia neganai, idia do ita lalokau henia noho’ bona unai ese kongregesen lalonai maino bona lalo-tamona ia havaraia. (Efe. 4:1-3) Ita ia durua gunalaia gaukara karaia totona idia abia hidi taudia ita kamonai henia totona. (Heb. 13:17) Unai ese iseda lalona ia veria ita dekenai idia henia sisiba eiava hakaua herevadia ita abia dae totona. (Sal. 141:5) Bona reana kongregesen lalonai maduna haida ita naria neganai, manau karana ese ita ia durua Iehova dekenai ita tabekau totona. (1 Pet. 4:11) Davida bamona, ita diba Dirava ena heduru dainai ita kwalimu, to taunimanima edia goada dainai lasi.—1 Sam. 17:37.
5 Iseda Dirava Ena Vairanai: Gau badana be, ‘Dirava ena imana goadana henunai ita manau’ be namo. (1 Pet. 5:6) Bema hekwakwanai idauidau ita haheaukalaia be namo, ita ura Basileia ese unai hekwakwanai idauidau do ia haorea. To mai manau ida ita haheauka, Iehova ita naria iena nega korikorina ai iena gwauhamata ia hagugurua totona. (Iam. 5:7-11) Abidadama tauna Iobu bamona, ita laloa bada gauna be ‘Lohiabada ena ladana do ita hanamoa noho.’—Iobu 1:21.
6 Peroveta tauna Daniela be Dirava vairanai ‘sibona ia hamanaua’ bona Iehova ena lalo-namo bona hahenamo namodia momo ia abia. (Dan. 10:11, 12) Unai hegeregerena, namona be manau be dabua bamona ita atoa, badina ita diba ‘Iehova do ita gari henia, bona do ita manau. Inai bamona ita karaia neganai, kohu, bona matauraia, bona mauri do ita davaria.’—Aon. 22:4.