Kara Namo Taudia Tahua Noho
1 Iesu ena hadibaia herevadia, haroro gaukara ita karaia totona be mai ena hekwarahi. Ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua.” (Mat. 10:11) Taunimanima be ruma ai nega momo idia noho lasi dainai, unai tahua gaukarana be edena bamona ita karaia namonamo diba?
2 Oiemu Teritori Oi Laloa: Gau ginigunana be emu teritori oi laloa. Edena negai taunimanima be ruma ai do idia noho? Dina lalonai edeseniai oi davaridia diba? Wiki lalonai edena dina eiava dina lalonai edena hora be reana ia namo dainai ruma tauna oi vadivadi henia neganai oi do ia abia dae? Oiemu teritori ai taunimanima edia noho dalana hegeregerena emu haroro gaukara oi haidaua, unai ese oi do ia durua namo bada oi havaraia totona.—1 Kor. 9:23, 26.
3 Pablisa momo be adorahi ai taunimanima momo idia davaria. Unai nega ai ruma taudia be idia laga-ani noho bona idia ura kamonai. Danu, dala haida be bisinesi teritori bona taunimanima idia noho gabudia ai ita haroro diba, unai amo taunimanima dekenai sivarai namona ita harorolaia. Nega haida, telefon amo taunimanima ita haroro henia be mai ena namo.
4 Hua ta ena gaukara badana lalonai, kongregesen ta be dala idia hegaegaelaia Saturday, Sunday, Wednesday bona Friday edia adorahi ai idia haroro totona. Danu, dala idia karaia telefon bona bisinesi teritori ai idia haroro totona. Unai ese momo ia hagoadaia bada idia haroro totona, unai dainai kongregesen taudia idia ura unai dala idia badinaia noho.
5 Lou Henia Ita Karaia: Bema emu teritori ai lou henia oi karaia neganai taunimanima be edia ruma ai oi davaria lasi be hekwakwanai ta, namona be lou henia ta ta, lou henia ginigunana danu, oi itaia murinai, dina ta oi makaia oi giroa lou totona. Bena, oi makaia dinana ai oi giroa lou be namo. (Mat. 5:37) Bema hegeregere, ruma tauna ena telefon namba totona oi henanadai. Unai ese danu oi ia durua diba unai tauna oi hereva henia lou totona.
6 Kara namo taudia ita tahua goadagoada bona ita davaria kamonai taudia ita lou henia neganai, Iehova ena hanamoa do ita abia.—Aon. 21:5.