Dirava amo Ia Mai Aonegana Ena Namo
1 Taunimanima haida idia laloa, Iehova ena Witnes taudia idia hekwarahi be namo hari taunimanima ese idia davaria hekwakwanai idia hamaragia totona. Unai bamona taudia ese iseda Baibel hadibaia gaukarana ena namo idia lalo-pararalaia lasi. Unai be aposetolo Paulo ena hereva hegeregerena, ia gwau: “Mase ena dala dekenai idia raka noho taudia ese idia gwau Keriso ena mase satauro dekenai herevana be kavakava. To ita mauri ena dala dekenai ita raka noho taudia be ita diba Keriso ena satauro herevana be Dirava ena siahu.” (1 Kor. 1:18) Momokani, ita diba Keristani haroro gaukara be hari tanobada ai ita karaia mai anina bada gaukarana.
2 Mauri Namona Hari: Taunimanima idia hekwarahi hari idia vara hekwakwanai idauidau idia haorea totona, to namo ta ia vara lasi. Gavamani edia taravatu ese idia bada daekau taravatu utua karadia ia koua diba lasi. Idia karaia maino gwauhamatadia bona maino karaia tuari oreadia be tuari idia haorea diba lasi. Taunimanima idia durudia totona idia karaia palani idauidau ese ogogami ia haorea diba lasi. (Sal. 146:3, 4; Ier. 8:9) To, Basileia ena sivarai ese taunimanima milioni momo ia durua edia mauri idia haidaua bona Dirava ese ia abia dae mauri matamatana idia atoa totona. (Roma 12:2; Kol. 3:9, 10) Unai bamona idia karaia dainai, hari mauri namona idia moalelaia.—1 Tim. 4:8.
3 Vaira Negana Namona: Dirava amo ia mai aonegana ese ita ia durua mauri ena hekwakwanai idauidau ita hanaia, bona danu vaira negana totona palani namona ita karaia totona. (Sal. 119:105) Ita ia koua inai tanobada hanamoa karana dekenai do ita hekwarahi kava lasi totona. (Had. 1:15; Roma 8:20) Ita moale badina iseda mauri lalonai anina lasi gaudia ita tahua lasi! To, Iehova ia gwauhamatalaia vadaeni kara maoromaoro “guba matamata bona tanobada matamata” ita naria noho. Iehova ena hahemaoro dinana ia mai neganai, do ia hedinarai goevagoeva Dirava amo ia mai aonegana dekenai idia tabekau taudia be abia hidi maorona idia karaia.—2 Pet. 3:10-13; Sal. 37:34.
4 Ena be inai tanobada ena aonega idia laloa bada taudia dekenai Dirava amo ia mai aonegana ese durua momokani ia henia lasi, to ia be aonega dalana. (1 Kor. 1:21; 2:6-8) Unai dainai, tanobada hegegemadai dekenai Dirava, “aonega Dirava tamona” unai, amo ia mai sivarai do ita harorolaia noho.—Roma 16:27.