Iseda Lalokau Ita “Habadaia”

¹ Keristani tadikaka oreana lalonai, ita ta ta be mai eda maduna kongregesen dekenai lalokau ita hahedinaraia totona. (1 Pet. 1:​22; 2:​17) Unai bamona lalokau ita hahedinaraia karana ita “habadaia” be namo. (2 Kor. 6:​12, 13) Dahaka dainai iseda tadikaka bona taihu ita dibaia namonamo be gau badana?

² Turana Karana Ia Goada Ia Lao: Iseda tadikaka ita dibaia namonamo neganai, edia abidadama, haheauka bona ma kara namodia ma haida ita laloa bada. Edia kerere maragidia ita laloa bada lasi bona turana karana ia goada ia lao. Ta ta ita dibaia namonamo neganai, do ita hegeregere momokani ita hagoadaia heheni totona. (1 Tes. 5:​11) Satani ena tanobada ena ura dikadia ita dadaraia totona, ta ta ita “durua bada herea” be namo. (Kol. 4:​11) Nega dokona ena hekwakwanai momo ita laloa neganai, ita moale bada herea badina Iehova ena taunimanima huanai ita be mai eda tura namodia!​​—Aon. 18:24.

³ Hahetoho ita davaria neganai, Iehova idia hesiai henia taudia huanai idia noho tura namodia ese ita idia hagoadaia diba. (Aon. 17:17) Keristani hahine ta, sibona ena lalo-manoka ia hekwarahilaia taihuna, ia gwau: “Egu turana haida ese egu kara namodia idia gwauraia lau dekenai, unai amo lau idia durua egu lalo-manoka lau hanaia totona.” Unai bamona turadia be hahenamo ta Iehova amo.​​—Aon. 27:9.

⁴ Ma Haida Edia Namo Tahua: Edena dala ai iseda tadikaka dekenai iseda lalokau ita habadaia diba? Keristani heboudia dekenai ma haida ita hanamoa sibona lasi, to ita hekwarahi idia ida mai anina bada gaudia ita herevalaia totona. Ma haida edia namo ita tahua dalana ma ta be, idia ita boiria ita aniani hebou totona. Edena negai emu kongregesen amo ta oi boiria vadaeni, oi ida ia aniani eiava ti umui inua hebou totona? (Luka 14:​12-​14) Eiava reana dala oi karaia haroro gaukara dekenai umui gaukara hebou totona. (Luka 10:1) Iseda tadikaka ita dibaia namonamo totona dala ita karaia neganai, kongregesen ena lalo-tamona karana ita habadaia unai.​​—Kol. 3:​14.

⁵ Ita ese Iehova idia hesiai henia lasi varavara taudia ita abia hidi, ita bamodia totona, a? Iesu ese ia hahedinaraia goevagoeva, Iehova idia hesiai henia taudia be iseda tadikaka, taihu bona sinana korikoridia, lauma dalanai iseda ruma bese taudia unai. (Mat. 12:​46-50) Iseda Tamana be tamona, unai dainai ita be ruma bese tamona taudia. Emu “ruma bese korikorina” dekenai emu turana karana oi habadaia diba, a? Oi hekwarahi bada emu tadikaka bona taihu ibounai, provinsi eiava gado idauidau taudia danu, oi dibaia namonamo totona, a? Unai bamona ita karaia neganai, ita laloa lasi hahenamo idauidau ita abia diba.

⁶ Ma haida dekenai iseda lalokau ita habadaia neganai, ta ta ita hagoadaia heheni bona kongregesen dekenai maino ia habadaia. Ma danu, iseda tadikaka dekenai lalokau ita hahedinaraia dainai, Iehova ese ita do ia hanamoa. (Sal. 41:​1, 2; Heb. 6:​10) Tadikaka momo herea oi diba namonamo karana be emu tahua gauna ai oi halaoa be namo, ani?

[Study Questions]

1. Ita ta ta eda maduna be dahaka?

2. Dahaka dainai iseda tadikaka ida tura karana ita habadaia be gau badana?

3. Edena bamona ma haida ita durua bada herea diba?

4. Kongregesen dekenai ma haida be edena bamona do ita dibaia namonamo?

5. Iseda varavara bona ruma bese taudia korikoridia be daidia, bona edena dala ai kongregesen dekenai iseda turana karana ita habadaia diba?

6. Dahaka namo haida do ita abia bema iseda tadikaka dekenai iseda lalokau ita habadaia?