Kahana 2—Baibel Stadi Namodia Karaia
Hegaegae Stadi Karaia Totona
1 Baibel stadi tauna ita hadibaia namonamo ena anina be stadi gauna ita herevalaia bona siri ita itaia sibona lasi. Ita ese stiuden tauna ena kudouna ia hamarerea dalanai ia ita hadibaia be namo. Unai ena anina be stiuden tauna ita laloa bona ita hegaegae namonamo.—Aon. 15:28.
2 Hegaegae Dalana: Oi hegaegae totona gau ginigunana be, stiuden tauna bona ia abia be namo gaudia totona Iehova oi guriguri henia. Iehova oi noia oi ia durua stiuden tauna ena kudouna oi hamarerea totona. (Kol. 1:9, 10) Sinado ita lalo-pararalaia namonamo totona, nega sisina lalonai karoa eiava stadi ena hereva kwarana, hereva kwarana maragidia, bona laulau oi laloa. Oi sibona oi nanadaia, ‘Inai stadi ena hereva badana be dahaka?’ Unai ese oi do ia durua stadi lalonai hereva badadia oi gwauraia totona.
3 Paragraf ta ta oi riviulaia namonamo. Buka lalonai idia noho henanadai edia haere oi tahua, hereva badadia sibona oi makaia. Paragraf lalonai idia gwauraia siridia ese hereva badadia idia durua dalana oi stadilaia namonamo, bona stadi lalonai do oi duahia siridia oi abia hidi. Reana oi ia durua gauna ta be stadi bukana ai siri edia hereva kwadogidia oi torea. Namona be stiuden tauna ia lalo-parara ia dibaia gaudia be Dirava ena Hereva amo.—1 Tes. 2:13.
4 Ta Ena Diba Hegeregerena Oi Hadibaia: Gabeai, stadi gauna oi hegaegaelaia neganai, stiuden tauna oi laloa. Do ia henia henanadai bona do ia auka ia lalo-parara eiava abia dae hereva badadia oi laloa guna. Oi sibona oi nanadaia: ‘Dahaka ia lalo-pararalaia eiava karaia be namo lauma dalanai ia tubu totona? Edena bamona ena kudouna lau hamarerea diba?’ Bena unai dala amo oi hadibaia diba. Nega haida reana haheitalai ta, hereva ta ena anina, eiava henanadai haida oi hegaegaelaia diba stiuden tauna oi durua hereva ta eiava siri ta ia lalo-pararalaia totona. (Neh. 8:8) To umui herevalaia gauna ia durua lasi gaudia oi herevalaia lasi. Stadi ia ore neganai, nega sisina lalonai hereva badadia oi riviulaia, unai ese ia do ia durua hereva badadia ia laloatao totona.
5 Kamonai matamata taudia be kara maoromaoro ena huahua idia hahedinaraia bona Iehova ena ladana idia hanamoa neganai, ita moale bada herea! (Fili. 1:11) Idia ita durua unai tahua gauna idia davaria totona, Baibel stadi ita karaia negadia ta ta ai ita hegaegae namonamo guna be namo.