Karaharaga Lalohadaina Dogoatao Noho!
1 Iesu ia diba tanobada dekenai ena Tamana ena gaukara ia hagugurua ena nega be kwadogi. (Ioa. 9:4) Unai dainai, mai karaharaga lalohadaina ida ena hesiai gaukara ia karaia, bona iena hahediba taudia ia hadibaia unai bamona idia karaia totona. (Luka 4:42-44; 8:1; 10:2-4) Ia ese tauanina gaudia ia laloa bada lasi. (Mat. 8:20) Unai dainai, Iehova ese ia dekenai ia henia gaukarana be ia hagugurua diba.—Ioa. 17:4.
2 Nega Kwadogina: “Tanobada ibounai dekenai” sivarai namona harorolaia gaukara ena nega be ia kwadogi danu. (Mat. 24:14) Baibel ena peroveta herevana ese ia hahedinaraia, ita be dokona negana lalonai ita noho. Kahirakahira “Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia . . . do ia hadikaia ore momokani.” (2 Tes. 1:6-9) Unai hahemaoro negana be karaharaga do ia ginidae. (Luka 21:34, 35; 1 Tes. 5:2, 3) Taunimanima dekenai unai dika do ia vara dainai, unai idia diba be namo. Iseda maduna be, nega ia do noho lalonai, namona be idia ita durua Iehova ena lalo-namo idia tahua totona.—Sep. 2:2, 3.
3 Ita Gaukara Goada: Dirava ena hesiai taudia idia lalo-parara “nega be kwadogi” dainai, haroro gaukara idia atoa guna. (1 Kor. 7:29-31; Mat. 6:33) Haida be moni gaukara eiava edia ura gaudia haida idia dadaraia, unai amo edia hesiai gaukara idia habadaia. (Mar. 10:29, 30) Ma haida be dagedage idia haheaukalaia lalonai, ‘Lohiabada ena gaukara idia karaia goadagoada’ noho. (1 Kor. 15:58) Momo be lagani momo lalonai taunimanima dekenai sivarai namona idia harorolaia bona idia goada noho. (Heb. 10:23) Iehova be unai Basileia gaukarana idia durua boubou karadia ibounai ia laloa bada.—Heb. 6:10.
4 Iseda mauri lalonai Iehova tomadiho henia karana bona haroro gaukara ita atoa guna neganai, unai ese ita ia durua Iehova ena dina ita laloa noho totona. Unai ese Satani ena tanobada ena lalona veria gaudia amo ita ia gimaia bona ita ia hagoadaia kara helagana ita badinaia noho totona. (2 Pet. 3:11-14) Oibe, mai karaharaga lalohadaina ida iseda hesiai gaukara ita karaia neganai, unai ese ita bona ita idia kamonai henia taudia do ia hamauria.—1 Tim. 4:16.