Ruma Bese Sediual—Kongrigeisen Heboudia
1 Bema oi be Keristani tama eiava sina ta, oi ura emu natudia idia bada neganai, Iehova do idia lalokau henia, idia hesiai henia bona Dirava ia gwauhamatalaia tanobada matamatana ai mauri hanaihanai do idia abia. Edena dala ai idia oi durua diba edia mauri lalonai Iehova tomadiho henia karana idia atoa guna totona? Dala badana ta be emu haheitalai amo. (Aon. 20:7) Taihu ta be ena sinana ena haheitalai ia laloatao neganai, ia gwau: “Ai daradara lasi bema hebou dekenai do ai lao eiava lasi.” Unai ia laloaboio diba lasi.
2 Oiemu ruma bese be kongrigeisen heboudia ita abia ena badina idia lalopararalaia, a? Unai heboudia ai ita abia hadibaia herevadia ese ita idia durua Dirava ena ura ita karaia noho totona, bona iseda tadikaka ida ita moalelaia hebamo karana ese ita ia hagoadaia bada. (Isa. 54:13; Roma 1:11, 12) To, unai bamona hebou edia badina badana be “hebou badana lalonai” Iehova ita hanamoa totona. (Sal. 26:12) Keristani heboudia ese dala idia kehoa Iehova dekenai iseda lalokau ita hahedinaraia bona Ia ita tomadiho henia totona.
3 “Emui Kara Do Umui Naria Namonamo”: Ita hebou ena badina badana ita lalopararalaia karana ese iseda lalona do ia veria ‘iseda kara ita naria namonamo’ totona, unai amo anina lasi gaudia dainai hebou reaia karana do ita manadalaia lasi. (Efe. 5:15, 16; Heb. 10:24, 25) Ruma bese sediual oi karaia neganai, kongrigeisen heboudia totona idia makaia negadia oi makaia guna. Bena oi naria namonamo gaukara ma haida ese edia gabu idia abia lasi. Namona be emu ruma bese taudia ese hebou lao henia karana idia laloa bada.
4 Iseda tadikaka be hebou maragidia bona badadia idia lao henia totona idia ia koua gaudia idia hanaia dalana ita duahia neganai, unai ese ita ia hagoadaia, ani? Ena be emu noho dalana be auka momokani lasi, to hekwakwanai haida oi davaria danu. Satani dainai Dirava ena taunimanima ese Iehova idia tomadiho henia be auka. To, namona be oi diba emui natudia do idia itaia, emui ruma bese be idia hekwarahi bada hebou ibounai idia lao henia totona. Momokani, unai bamona ita karaia neganai, idia dekenai lauma ena harihari gauna, do idia laloaboio diba lasi gauna unai, ita henia.