Ita Ia Durua Sikulina
1 Lagani 2006 ena Tiokratik Haroro Sikuli Ena Sediual ena kahana ta ta ita laloa neganai, namona be ita hekwarahi Baibel ena hahediba herevadia amo namo ita abia totona. Unai amo iseda haroro gaukara bona mauri lalonai ita badinaia diba. Namona be iseda lalona ita hadaia ita dibaia gaudia ita badinaia totona.—Ioa. 13:17; Fili. 4:9.
2 Haere Henia: Inai lagani ena sediual lalonai Baibel ena hereva badadia kahana dekenai, miniti faiv be helai taudia edia nega haere idia henia totona. Anina be Baibel ena hereva badadia ia henia tadikakana be miniti faiv lalonai ena kahana do ia karaia, miniti siks lasi. Bona helai taudia be edia haere idia henia neganai, edia nega idia laloa danu be namo. Haere ia henia tauna ese ena haere ia laloa namonamo guna be namo, unai amo ena hereva be sekeni 30 lalonai ia henia diba. Reana miniti faiv lalonai helai taudia 10 bamona be haere idia henia diba.
3 Hereva Henia Dalana: Baibel ena hereva badadia bona instraksen tok idia karaia tadikaka ese unai kahadia edia namo idia herevalaia be namo, unai amo iseda haroro gaukara ai bona mauri lalona ita badinaia diba. Hereva henia tauna be kamonai taudia edia lalona ia veria kara ta idia karaia totona sibona lasi. To, namona be ia hahedinaraia dahaka idia karaia be namo, edena bamona do idia karaia, bona unai bamona idia karaia neganai, dahaka namo do idia abia. Oi gwau diba, “Inai siri be edena bamona ita ia durua?” eiava “Haroro gaukara ai inai siri be edena bamona ita gaukaralaia diba?” Elda bona hesiai taudia ese hereva ta idia henia neganai, namona be kamonai taudia be edia noho gabu dekenai idia badinaia diba gauna idia herevalaia.
4 Namona be kamonai taudia ese idia badinaia diba Baibel haheitalaidia oi gaukaralaia. Hereva henia tauna be Baibel amo haheitalai ta ia gwauraia murinai, inai bamona ia gwau diba, “Unai haheitalai ese edena bamona oi ia durua?” Namona be ia herevalaia gauna be Baibel amo, bona “hesiai tauna mai ena kamonai, bona mai ena kara maoromaoro” ese idia hegaegaelaia buka ida ia hegeregere.—Mat. 24:45.
5 Aonega be diba bona laloparara gaukaralaia namonamo karana. “Gau badana momokani be aonega.” (Aon. 4:7) Tiokratik Haroro Sikuli amo iseda aonega ita habadaia noho lalonai, ma haida hadibaia karana do ita hanamoa noho diba.