Manau Taudia Hadibaia Dirava Ena Dala Dekenai Idia Raka
1 Baibel ese Keriso ena hahediba taudia ginigunadia ia herevalaia neganai, ia gwau idia be Lohiabada ena “Dala” idia badinaia taudia. (Kara 22:4) Ta ese ena mauri ibounai lalonai Keristani tomadiho momokani ena dala ia badinaia be namo. (Aon. 3:5, 6) Unai dainai, stiuden taudia ita stadi henidia neganai, namo lasi Baibel ena hahediba herevadia ena diba maoromaoro sibona ita hadibaia. To danu, namona be idia ita durua Iehova ena dala dekenai idia raka totona.—Sal. 25:8, 9.
2 Stiuden Durua Iehova Bona Iesu Idia Lalokau Henia: Goevadae lasi taudia ese edia lalohadai, hereva, bona kara idia haidaua bena Iehova ena ura idia badinaia be mai ena hekwarahi! (Roma 7:21-23; Efe. 4:22-24) To, Dirava bona ena Natuna lalokau henia karana ese manau taudia ia durua Dirava idia badinaia totona. (Ioa. 14:15; 1 Ioa. 5:3) Edena dala ai iseda Baibel stiuden ita durua diba unai lalokau idia habadaia totona?
3 Emu Baibel stiuden oi durua Iehova ena kara ia dibaia. Tadikaka ta ia gwau, “Taunimanima be idia diba lasi tauna idia lalokau henia diba lasi, unai dainai stadi ginigunana ai Iehova ena ladana be Baibel amo lau hadibadia, unai murinai dala lau tahua Iehova ena kara idauidau do lau gwauraia totona.” Unai ita karaia totona dala hereadaena be, Iesu ena haheitalai ita gwauraia. (Ioa. 1:14; 14:9) Ma danu, Baibel Hadibaia bukana ena karoa ta ta edia dokonai ia noho riviu mauana oi gaukaralaia, stiuden taudia oi durua, Dirava bona ena Natuna edia kara namodia idia lalohadailaia.
4 Emu Haheitalai amo Hadibaia: Ita be hadibaia bona hakaua taudia dainai, namona be ma haida idia itaia ita be Dirava ena dala dekenai ita raka. (1 Kor. 11:1) Hegeregere, Baibel stiuden momo be idia diba lasi taudia dekenai edia abidadama idia gwauraia karana idia manadalaia lasi. Unai dainai, bema oi ura emu stiuden taudia be haroro bona hahediba taudia halaoa gaukarana lalonai lalokau, abidadama, bona boga-auka idia hahedinaraia, vadaeni oi haheauka bona emu diba oi gaukaralaia namonamo. (2 Kor. 4:13; 1 Tes. 2:2) Ita ura iseda stiuden ita durua dainai, nega ginigunana Keristani haroro gaukara ia karaia neganai, ia danu do ita gaukara hebou bona do ita hakaua.
5 Oiemu haheitalai namona ese stiuden taudia ia hadibaia, Keristani tauna ena kara ma haida ia hahedinaraia totona. Gorere taudia oi vadivadi henia eiava kongrigeisen hebou dekenai ma haida oi hanamoa neganai, lalokau oi hahedinaraia dalana idia itaia. (Ioa. 15:12) Kingdom Hall hagoevaia gaukarana oi karaia eiava ma haida oi durua neganai, hesiai gaukara karaia dalana be idia dekenai oi hadibaia unai. (Ioa. 13:12-15) Bema idia itaia emu mauri lalonai kohu momo oi tahua lasi, idia be ‘Basileia tahua guna’ ena anina idia lalopararalaia.—Mat. 6:33.
6 Baibel amo ma haida ita hadibaia bona taunimanima be hahediba taudia ai ita halaodia be gaukara badana. To manau taudia be “hereva momokani ena dala dekenai idia raka” ita itaia neganai, unai ese ita ia hamoalea bada!—3 Ioa. 4.
[Study Questions]
1. Bema ita ura ta ita durua hahediba tauna ai do ia lao totona, dahaka ita karaia be namo?
2. Dahaka ese Baibel stiuden tauna do ia durua Dirava ena taravatu ia badinaia totona?
3. Edena dala ai stiuden ita durudia edia lalokau Iehova bona Iesu dekenai idia habadaia totona?
4. (a) Dahaka dainai stiuden momo idia hekwarahi haroro gaukara idia karaia totona? (b) Edena dala ai Keristani haroro gaukara lalonai iseda stiuden ita durua diba?
5. Edena dala ai, iseda haheitalai namona ese stiuden taudia ia durua Dirava ena taravatu badinaia karana ena anina idia lalopararalaia?
6. Manau taudia ita durua Iehova idia hesiai henia neganai, iseda hemami be edena bamona?