“Dibagani Ia Abia Neganai Ia Gini Noho, mai Haheauka Danu Tauna be Namo”
1 Keristani taudia ibounai ese dibagani idia davaria. (2 Tim. 3:12) Gorere, moni ena hekwakwanai, hahetoho, hisihisi, eiava ma gau haida dainai dibagani do ita davaria. Satani ese ita ia hamorua totona dibagani ia gaukaralaia, unai amo iseda Keristani haroro gaukara do ita laloa bada lasi eiava Dirava hesiai henia karana ia koua. (Iobu 1:9-11) Edena dala ai dibagani idauidau ita haheaukalaia karana ese moale ia havaraia?—2 Pet. 2:9.
2 Hedibagani Totona Hegaegae: Iehova ese Baibel be ita dekenai ia henia, unuseniai Iesu ena mauri dalana bona ena haheitalai ia noho. Iesu ena hereva ita badinaia neganai, iseda abidadama ia hagoadaia bona ita ia hahegaegaea hedibagani negadiai ita haheauka totona. (Luka 6:47-49) Dala ma haida idia noho, hegeregere iseda Keristani tadikaka oreana, kongrigeisen heboudia, bona hesiai tauna mai ena kamonai bona mai ena kara maoromaoro oreana amo idia mai Baibel idia herevalaia bukadia bona magasin amo heduru ita abia. Bona hanaihanai Dirava ita guriguri henia be gau badana.—Mat. 6:13.
3 Danu Iehova ese ita dekenai helaro ia henia. Iehova ena gwauhamata ita abidadama henia neganai, unai helaro be “iseda mauri dogoatao gauna, dogo ese vanagi ia dogoatao bamona.” (Heb. 6:19) Baibel negadiai, sisima badadia dekenai dogo be mai anina bada, ena be lai badadia idia toa lasi. To bema lai badana ia toa, sisima be lai ese ia hadikaia lasi totona dogo be davara dekenai idia tahoa dobi, unai amo sisima be nadi dekenai ia kamokau lasi. Unai hegeregerena, Dirava ena gwauhamata ita abidadama henia, unai amo lai bamona dibagani ita davaria neganai do ita moru lasi. Dika badadia be karaharaga idia vara diba. Lusitera hanua dekenai, taunimanima be Paulo bona Banaba edia haroro herevana idia kamonai, to gabeai Iuda taudia idia dagedage henia taudia idia mai neganai, Lusitera taudia edia kara idia haidaua haraga.—Kara 14:8-19.
4 Haheauka Karana ese Moale Ia Havaraia: Ena be hahetoho idia vara, to haroro loulou karana ese lalomaino ia havaraia. Keriso dainai ita idia hahisia, to ita haheauka dainai unai ese moale ia havaraia. (Kara 5:40, 41) Dibagani idauidau ita haheaukalaia neganai, unai ese ita ia durua manau, kamonai, bona haheauka karana ita hahedinaraia noho totona. (Deu. 8:16; Heb. 5:8; Iam. 1:2, 3) Haheauka karana ese ita ia durua Iehova ita tabekau henia totona, ena gwauhamata ita abidadama henidia, bona ita abia dae Ia sibona be iseda heau mauri gabuna.—Aon. 18:10.
5 Ita diba hari ita abia dibagani be do idia noho daudau lasi. (2 Kor. 4:17, 18) Dibagani ese dala ia kehoa, iseda lalokau Iehova dekenai ita hahedinaraia totona. Ita haheauka neganai, Satani ena samani herevana do ita hakoikoia. Unai dainai, ita hesiku lasi! “Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria.”—Iam. 1:12.