Ita Giroa Loulou Ena Badina
1 Gabu momo dekenai, teritori ita karaia loulou. Ena be ruma tauna ia ura lasi kamonai, to ita giroa loulou. Dahaka dainai sivarai namona idia ura lasi kamonai taudia dekenai ita giroa loulou?
2 Iehova Bona Taunimanima Ita Lalokau Henia: Iehova ita lalokau henia dainai, haroro gaukara ita goadalaia. Eda kudouna ese ita ia doria, Dirava ena kara badadia be ma haida dekenai ita gwauraia totona. (Luka 6:45) Iehova ita lalokau henia dainai, ia henia haheganina ita badinaia bona ma haida ita durua unai bamona idia karaia totona. (Aon. 27:11; 1 Ioa. 5:3) Ena be taunimanima idia kamonai lasi, to unai ese haroro gaukara ia koua lasi. Ena be Keristani taudia ginigunadia be dagedage idia davaria, to haroro gaukara “idia hadokoa lasi.” (Kara 5:42) Taunimanima idia kamonai lasi neganai, namo lasi ita lalomanoka, to namona be ita gini goada bona Iehova dekenai iseda lalokau bona badinaia karana ita hahedinaraia.
3 Iseda dekena taudia ita lalokau henia dainai, haroro gaukara ita goadalaia. (Luka 10:27) Iehova ia ura lasi ta ia mase. (2 Pet. 3:9) Ena be teritori ita karaia loulou, to idia ura Iehova idia hesiai henia taudia momo ita davaria noho. Hegeregere, Guadeloupe ai, taunimanima 56 amo ta be Iehova ena Witnes tauna, bona lagani gunanai unai gabu dekenai taunimanima 214 be bapatiso idia abia. Memorial dekenai idia lao taudia ibounai be 20,000 mai kahana, anina be Guadeloupe ai idia noho taudia 22 22 amo ta ta be Memorial idia lao!
4 Taunimanima Edia Kara Idia Haidaua: Iseda teritori dekenai taunimanima idauidau idia noho. Guna ia kamonai lasi tauna ena ruma dekenai ita giroa lou neganai, ruma bese tauna ma ta do ita davaria—reana sivarai namona ia do kamonai lasi tauna—ese sivarai namona do ia kamonai. Eiava unai ruma dekenai idia noho taudia be matamatadia bona sivarai namona idia ura kamonai. Natudia idia maragi neganai tama sina ese idia koudia sivarai namona idia kamonai lasi totona, to idia bada neganai edia noho gabuna idia rakatania. Unai bamona taudia be Basileia sivaraina do idia kamonai.
5 Taunimanima edia kara idia idau danu. Guna, aposetolo Paulo be ‘Keriso ia hereva dika henia, ia dagedage henia, bona iena ladana ia hadikaia.’ (1 Tim. 1:13) Unai hegeregerena, hari Iehova idia hesiai henia taudia momo be guna hereva momokani idia ura lasi kamonai. Haida be reana sivarai namona harorolaia gaukarana idia koua toho. Tanobada ena toana ia idau dainai, ita idia inai henia o idia ura lasi kamonai taudia be reana edia kara do idia haidaua bona do idia ura kamonai. Haida be reana dika badana ta idia davaria, hegeregere ruma bese lalonai ta ia mase, moni gaukara idia haboioa, moni ena hekwakwanai, eiava gorere badana ta idia abia dainai, idia ura sivarai namona idia kamonai.
6 Inai tanobada dikana be kahirakahira do ia ore, to iseda haroro bona hadibaia gaukara be Dirava ese ia haharagaia noho. (Isa. 60:22) Unai dainai, mai eda ura bada ida haroro gaukara ita goadalaia bona lalohadai maorona ita dogoatao noho. Badina gabeai do ita hereva henia tauna be reana do ia ura kamonai. Namona be ita giroa loulou! ‘Unai dekena amo, ita sibona ese mauri do ita davaria, bona ita dekenai idia kamonai taudia danu ese mauri do idia davaria.’—1 Tim. 4:16.
[Study Questions]
1. Haroro gaukara totona, dahaka henanadai ia noho?
2. Haroro gaukara ita goadalaia ena badina be dahaka?
3. Edena dala ai dekena tauna lalokau henia karana ese ita ia durua, haroro gaukara ita goadalaia totona?
4. Teritori ai, taunimanima dekenai dahaka ia vara diba?
5. Dahaka gaudia dainai, taunimanima ese sivarai namona idia kamonai?
6. Dahaka dainai mai ura bada ida haroro gaukara ita goadalaia?