Ita Abia Hahenamo Idauidau Ita Laloa Bada!
1 Gunaguna ema bona hari, Iehova ese ena hesiai taudia dekenai hahenamo idauidau ia henia. Ena be edia mauri lagani eiava noho daladia be idauidau, to hahenamo idauidau ia henia noho. (Luka 1:41, 42; Kara 7:46; Fili. 1:29) Hari inai negai, dahaka hahenamo idauidau ia henia ita dekenai?
2 Hahenamo Haida: Iehova ese ita ia hadibaia karana be hahenamo ta. (Mat. 13:11, 15) Danu, kongrigeisen heboudia dekenai haere henia karana amo Iehova ita hanamoa dainai ita moale. (Sal. 35:18) Mai ura bada ida haere ita henia diba. Unai hegeregerena, bema kongrigeisen lalonai ita abia hahenamodia ita laloa bada, unai gaudia do ita karaia namonamo. Ita ese Kingdom Hall hagoevaia bona hanamoa gaukarana be hanaihanai ita karaia, a?
3 Ena be momo idia daradara edia guriguri be Dirava ese ia kamonai o lasi, to ita moale badina atai herea Diravana ese iseda guriguri ia kamonai diba. (Aon. 15:29) Iehova ese ena hesiai taudia ta ta edia guriguri ia kamonai. (1 Pet. 3:12) Iehova guriguri henia karana be mai ena hetoana lasi. Unai dainai, namona be “nega ibounai” ita guriguri!—Efe. 6:18.
4 ‘Dirava Ena Gaukara Ita Karaia Hebou Noho’: Ita abia hahenamo ta be, Dirava ena Basileia harorolaia totona ita be ‘Dirava ena gaukara ita karaia hebou.’ (1 Kor. 3:9) Inai gaukara ese moale bona goada ia henia. (Ioa. 4:34) Iehova ese ita ia lalokau henia dainai, ita dekenai haroro gaukara ena maduna ia henia. (Luka 19:39, 40) To Iehova ese unai hahenamo be taunimanima dekenai ia henia kava lasi. Dirava ena taravatu idia badinaia taudia sibona be idia hegeregere haroro gaukara idia karaia totona. (Isa. 52:11) Wiki ta ta lalonai haroro gaukara ita karaia amo ita hahedinaraia inai hahenamo ita laloa bada, a?
5 Iehova ena amo idia mai hahenamo idauidau ese iseda mauri ia hanamoa. (Aon. 10:22) Unai dainai, unai hahenamo ita lalodia bada! Hesiai gaukara ena hahenamo idauidau ita laloa bada neganai, iseda guba Tamana, “gau namodia ibounai, bona harihari gaudia namodia momokani ibounai” ia Henia Diravana do ita hamoalea.—Iam. 1:17.