Iseda Hesiai Gaukara Ita Habadaia
1 Aposetolo Paulo be Keristani taudia ia hagoadaia Dirava ena dala do idia badinaia bona unai ‘kara do idia habadaia.’ (1 Tes. 4:1) Unai ena anina be dahaka ita ta ta dekenai? Iseda hesiai gaukara ita habadaia totona, namona be dala ita tahua Iehova ena hesiai gaukara lalonai maduna ma haida ita abia totona.—2 Tim. 4:5.
2 Badina: Ita ura iseda Havaraia Tauna ita hesiai henia dainai, iseda hesiai gaukara ita habadaia. Ita ura iseda hetura karana Iehova ida ia goada bona dala ita tahua iseda haroro gaukara ita hanamoa totona. Bema sediual namona ita karaia, unai ese ita do ia durua tiokratik tahua gaudia ita hagugurua totona.—Sal. 1:1, 2; Fili. 4:6; Heb. 10:24, 25.
3 Iseda haroro gaukara ita habadaia totona, namona be sibona eda ura ita dadaraia. Unai ita karaia diba bema Iesu ena haheitalai namona be mai guriguri ida ita laloa dobu. (Mat. 20:28) Iesu be ma haida hesiai henia karana ia moalelaia. (Kara 20:35) Iesu ita tohotohoa totona, namona be ma haida ita laloa bada, bona dala idauidau ai iseda haroro gaukara ita habadaia.—Isa. 6:8.
4 Tama Sina Edia Maduna: Ma haida hesiai henia bona haroro gaukara laloa bada karana be natudia idia do maragi neganai ita hadibaia be namo. Bema ruma bese taudia be hanaihanai haroro gaukara idia laloa bada, natudia ese unai do idia itaia. Tadikaka ta be ia maragi neganai, ena tubuna ida ia gaukara hebou bona tubuna ese kongrigeisen ena gaukara idauidau ia karaia dalana ia itaia. Unai dainai ia tubu daekau neganai, ena tubuna ena haheitalai namona ese ia ia durua ena hesiai gaukara ia habadaia totona. Ia itaia ena tubuna be ena hesiai gaukara ia moalelaia, unai ese ia ia hagoadaia ia danu be ma haida ia hesiai henia totona. Hari, ia be kongrigeisen ena hesiai tauna ta.
5 Gaukara Ia Bada Tadikaka Totona: “Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai.” (1 Tim. 3:1) Unai siri ese tadikaka ibounai ia hagoadaia Iehova ena orea lalonai maduna ma haida idia tahua totona. Namo lasi idia laloa unai idia karaia totona diba bada idia abia be namo. Maduna ma haida ia tahua tadikaka be Basileia ia atoa guna bona haroro gaukara ia goadalaia. (Mat. 6:33; 2 Tim. 4:5) Do ia gaukara goada ma haida dekenai haheitalai namona ia hahedinaraia totona.
6 Tanobada Hegegemadai: Iehova be ena gaukara ia haharagaia noho. (Isa. 60:22) Gaukara ia bada dainai, Iesu idia badinaia taudia ibounai ese haroro gaukara idia goadalaia be namo. Tanobada hegegemadai ena hesiai laganina 2006 ena ripoti ese ia hahedinaraia, taunimanima 248,327 idia bapatiso. Anina be, dina ta ta ai kamonai matamata taudia 680 idia vareai! Unai dainai, namona be ita ibounai ita hekwarahi iseda hesiai gaukara be dala idauidau ai ita habadaia totona.