Lalohisihisi Taudia Hagoadaia
1 Hari inai negai, taunimanima momo ita hagoadaia be gau badana. Iseda King, Keriso Iesu bamona, namona be ita danu ese “kudouna idia makohi [“lalohisihisi,” NW ] taudia” ita hagoadaia be namo.—Isa. 61:1.
2 Hagoadaia Dalana: Haroro gaukara negadiai taunimanima ita hagoadaia totona, namona be lalona hagoadaia herevadia ita gaukaralaia. Bema tanobada dekenai idia vara gau dikadia bona hahediba hereva koikoi ita herevalaia momo lasi, vadaeni Baibel ena hereva momokani bona Dirava ena gwauhamata namodia nega vaira totona do ita herevalaia momo diba. Vaia, Aramagedono ita herevalaia danu be namo. To, ita abia haheganina be inai: Dirava ese do ia havaraia “nega namona . . . bona ia ese iena bese taudia idia dagedage henia taudia, do ia halusia momokani ena sivarai” ita harorolaia, bona ‘dika tauna . . . ita hamaoroa iena kara dika do ia rakatania’ totona. To, ita ura lasi Aramagedono ese do ia havaraia gaudia ita herevalaia momo dainai, taunimanima ese Dirava ena Basileia ena sivarai namona idia laloaboio.—Isa. 61:2; Ese. 3:18; Mat. 24:14.
3 Ruma-Ta-Ruma-Ta Haroro Gaukara: Nega momo ita davaridia taudia haida idia lalohisihisi badina idia gorere, ruma bese lalonai ta ia mase, kara gageva be bada, eiava moni ena hekwakwanai ia vara. Ita be Keriso ita tohotohoa taudia dainai, haroro gaukara dekenai lalometau taudia ita davaria neganai, ita “bogahisihisi” henidia. (Luka 7:13; Roma 12:15) Ena be edia hekwakwanai hegeregerena, siri ta eiava rua ita duahia bona herevalaia, to namona be ruma tauna ena ‘hereva ita kamonai, to hereva do ita gwauraia haraga lasi,’ unai amo ia be ena lalohadai ibounai ia gwauraia hedinarai diba. (Iam. 1:19) Ruma tauna ena hereva ita kamonai murinai, lalona hagoadaia hereva maorona ita gwauraia diba.
4 Umui herevahereva noho lalonai, reana nega maorona ai oi gwau diba, “Lau ura Baibel amo lalona hagoadaia herevana ta lau duahia.” To, namona be oi naria namonamo, namo lasi ruma tauna ese ia gwauraia gaudia ibounai oi hamaoromaoroa toho. Gau badana be Baibel ita gaukaralaia ruma tauna ena lalona ita hagoadaia totona. Unai oi karaia totona, namona be Buka Helaga Herevalaia bukana ena rau 253 ia lao rau 257 ena hereva kwarana “Lalona Hagoadaia Herevadia” henunai idia noho herevadia oi gaukaralaia. Eiava ruma tauna dekenai Lalometau Taudia Hagoadaia Herevadia pepapepa ta oi henia bona ena hereva haida umui herevalaia hebou diba.
5 Ma Haida Hagoadaia Daladia: Emu dekena tauna, gaukara hebou turana, sikuli turana, eiava emu ruma bese tauna ta be ia lalometau, a? Iena ruma ai ia oi vadivadi henia be namo, unai amo Baibel amo oi hagoadaia diba. Bema ena hekwakwanai oi diba, vadaeni ia oi durua dalana oi hegaegaelaia namonamo guna. Haida be revareva eiava telefon amo unai hagoadaia herevadia idia gwauraia. Iseda dekena taudia ita lalokau henidia dainai, hebogahisi ita hahedinaraia bona Baibel amo idia ita hagoadadia.—Luka 10:25-37.
6 Oibe, Baibel be ita ia hagania, idia taitai bona lalometau taudia ita durua, bona nega vaira ena helaro namona be idia dekenai ita herevalaia totona. Tanobada hegegemadai idia noho taudia ibounai be unai bamona hagoadaia herevadia idia ura kamonai. Dirava ese do ia havaraia gwauhamata namodia be mai moale ida ita herevalaia neganai, unai ese kudou-maoro taudia edia lalona do ia hagoadaia bona helaro ia henidia. Namona be ita laloaboio lasi, iseda maduna be lalohisihisi taudia do ita hagoadaia.