Haroro Gaukara Lalonai Haheauka be Gau Badana
1 Lagani 30 mai kahana lalodiai, aposetolo Paulo be ena haroro gaukara ia moalelaia bada. Unai haroro gaukara lalonai hekwakwanai haida ia davaria danu. (2 Kor. 11:23-29) To, Paulo be haroro gaukara ia hadokoa lasi. (2 Kor. 4:1) Ia laloparara Iehova ese goada ia henia hisihisi ia haheaukalaia bona ena haroro gaukara ia hagugurua totona. (Fili. 4:13) Paulo be hisihisi ia haheaukalaia karana ia laloa bona ia gwau: “Lau karaia bamona do umui karaia, Keriso ena kara lau karaia bamona.”—1 Kor. 11:1.
2 Hari Inai Negai Hahetoho Haheaukalaia: Dina ta ta ai, iseda tadikaka momo be edia ruma bese taudia, gaukara turadia, o sikuli turadia ese idia badu henia, idia kirikirilaia bona idia dagedage henia. (Mat. 10:35; Ioa. 15:20) Reana oi dekenai danu be unai bamona gaudia idia vara. Unai sibona lasi, to reana oi gorere eiava dina ta ta ai oi gaukara goada lalona veria gaudia o emu abidadama bona haheauka idia tohoa gaudia oi hanaia totona. Idaunegai bona hari inai negai idia noho kamonai hesiai taudia ese hahetoho idia davaria bona idia hanaia, bona edia ekspiriens ita laloa karana ese ita dekenai goada do ia henia.—1 Pet. 5:9.
3 Namona be ‘Dirava ese ia henia tuari dabua ibounai ita kwatua’ namonamo, unai ese ita do ia durua ita haheauka bona haroro gaukara ita goadalaia noho totona. (Efe. 6:10-13, 15) Danu, guriguri karana ese ita do ia durua ita haheauka totona. Dirava be ena lauma helaga ia henia hahetoho idauidau ita haheaukalaia totona. (2 Kor. 6:4-7) Satani bona ena tanobada ita halusia totona, namona be Dirava ena hadibaia herevadia ita badinaia, goada matamata ita abia totona. (Sal. 119:24, 85-88) Natu ta be ena lalokau tamana amo ia abia revarevana ia duahia loulou hegeregerena, dina ta ta ai Baibel ita duahia karana ese iseda hetura karana Iehova ida ia hagoadaia. Sibona eda stadi ita karaia hanaihanai neganai, aonega do ita abia hahetoho ita hanaia, Dirava ena lalohadai hegeregerena abia hidi ita karaia, bona Dirava ita badinaia noho totona.—Aon. 2:10, 11.
4 Haheauka be mai Ena Hahenamo: Paulo dekenai ia vara hegeregerena, bema haroro gaukara lalonai ita haheauka, vadaeni Iehova ena kudouna do ita hamoalea bona ita bona ma haida be hahenamo momo do ita abia. (Aon. 27:11) Namona be iseda lalona ita hadaia haroro gaukara lalonai ita haheauka totona, unai amo ita hamomokania eda abidadama ia goada bona ia dika lasi—unai abidadama ese golo ia hereaia, badina ‘golo be ia dika diba,’ herevana lahi lalonai ‘iena goada idia tohoa bona idia hanamoa’ vadaeni.—1 Pet. 1:6, 7.