Duahiduahi Idia Diba Namonamo Lasi Taudia Hadibaia
1. Iseda haroro gaukara ai edena bamona taudia ita davaria?
1 Haroro gaukara ita karaia neganai, nega haida idia duahiduahi namonamo lasi o duahiduahi idia diba lasi taudia ita davaria. Dahaka ita karaia be namo?
2. Edena dala ai duahiduahi idia diba namonamo lasi o idia duahiduahi diba lasi taudia ita matauraia, bona dahaka dainai?
2 Ita Matauraidia: Iehova be ta ena kudouna ia laloa bada, to ena edukeisen o diba ia laloa bada lasi. (1 Sam. 16:7; Aon. 21:2) Unai dainai, duahiduahi idia diba namonamo lasi o idia duahiduahi diba lasi taudia ita laloa bada be namo. Matamanai, reana duahiduahi idia diba lasi dainai, do idia hemarai idia gwauraia hedinarai totona. Unai bamona taudia ita matauraia bona ita haheauka neganai, iseda heduru do idia abia dae. (1 Pet. 3:15) Anina be idia ita doria lasi Baibel siri ta o paragraf ta idia duahia totona. Ta be metairametaira Baibel ena hereva momokanidia ia dibaia neganai, do ia ura bada duahiduahi ia diba o ena duahiduahi karana ia hanamoa, unai amo ia be mai moale ida “dina bona hanuaboi ibounai lalonai” Dirava ena Hereva ia duahia diba.—Sal. 1:2, 3.
3. Edena dala ai duahiduahi idia diba namonamo lasi o idia duahiduahi diba lasi taudia ita hadibaia?
3 Baibel Stadi ai Hadibaia Daladia Haida: Laulau amo ta hadibaia be dala namona ta, unai ese ta ia durua ia dibaia gaudia ia laloatao totona. Reana emu stiuden oi noia diba umui stadilaia bukana ai ia noho laulau ia herevalaia totona. Bena henanadai haida oi henia, unai amo oi durua laulau ai ia itaia gauna ia lalopararalaia totona. Laulau ena point ia hahedinaraia Baibel siridia oi duahia. Laulau oi gaukaralaia diba stadi ai ia dibaia gaudia umui riviulaia totona. Gau momo oi herevalaia lasi. Stadi ena sinado bona ena hereva badadia oi herevalaia, to anina lasi herevadia oi gwauraia lasi. Baibel amo siri umui duahia bona henanadai oi gaukaralaia, unai amo do oi diba stiuden be umui duahia siri ena anina ia lalopararalaia eiava lasi. Unai ese iena ura do ia habadaia duahiduahi ia diba o ena duahiduahi karana ia hanamoa totona, unai amo ia sibona ese Baibel ena hereva momokanidia ia tahua diba.
4. Edena dala ai iseda stiuden ita durua duahiduahi ia diba o ena duahiduahi karana ia hanamoa totona?
4 Heduru Gaudia: Duahiduahi idia diba namonamo lasi o idia duahiduahi diba lasi taudia be hereva idia kamonai namonamo bona idia laloatao diba. Unai bamona taudia oi hagoadaia, iseda buka o magasin ena kaset o CD idia gaukaralaia totona. Kaset ia kamonai bona iena buka amo ia badinaia, bona ia kamonai hereva ia gwauraia lou karana ese ia do ia durua ena duahiduahi karana ia hanamoa totona. Danu buklet ladana, Apply Yourself to Reading and Writing eiava Duahiduahi Bona Toretore buklet be tulu namodia, duahiduahi karana dibaia totona. Gabu haida ai, elda taudia be kongrigeisen ai duahiduahi kosi ta idia karaia. Unai heduru daladia ita badinaia neganai, idia duahiduahi diba lasi taudia ita durua Baibel ena hereva idia lalopararalaia totona, unai hereva ese idia dekenai aonega do ia henia bona idia do ia hamauria.—2 Tim. 3:15.