Dirava Ita Lalokau Henia Dalana Ta—Iseda Haroro Gaukara
1. Iesu be Dirava ia lalokau henia dainai dahaka ia karaia?
1 Lalokau dainai Iesu be haroro gaukara ia karaia. Momokani, unai haroro gaukara amo ia hamomokania ia be Iehova ia lalokau henia bada. Iesu ia gwau: “Tanobada taudia do idia diba, lau ese egu Tamana lau lalokau henia, bona egu Tamana ese lau dekenai ia hereva henia hegeregerena, lau gaukara noho.” (Ioa. 14:31) Ita be Iesu murinai ita raka taudia dainai, namona be eda haroro gaukara amo ita hahedinaraia ita danu be Dirava ita lalokau henia.—Mat. 22:37; Efe. 5:1, 2.
2. Dahaka dainai haroro gaukara lalonai Iehova lalokau henia karana be mai anina bada?
2 “Oiemu Ladana Do Ai Hahelagaia”: Nega bona gabu idauidau ai ita davaria taudia dekenai Iehova bona ena Basileia ena sivarai ita harorolaia neganai, ita hahedinaraia ita be Iehova ita lalokau henia, bona ena ladana ita hahelagaia. (Sal. 83:18; Ese. 36:23; Mat. 6:9) Iesu bamona, haroro gaukara ita karaia noho badina ita ura bada Iehova ena ladana ita hahelagaia bona ena ura ita karaia.—Mat. 26:39.
3. Edena dala ai Iehova ita lalokau henia karana ese ita ia durua koua gaudia ita hanaia totona?
3 Lalokau ese Ita Ia Durua Koua Gaudia Ita Hanaia Totona: Iehova ia lalokau henia tauna be koua gaudia ibounai ia hanaia diba. (1 Kor. 13:4, 7) Iesu be ena mauri lalonai hekwakwanai idauidau ia davaria, to unai ese ena haroro gaukara idia koua, a? Lasi, Iesu be mai ena lalokau bona ia ura Iehova ena ura ia karaia dainai, unai hekwakwanai ibounai ia hanaia. (Mar. 3:21; 1 Pet. 2:18-23) Ita danu be Dirava ita lalokau henia dainai, unai ese ita do ia durua koua gaudia idauidau ita hanaia totona. Bema Keriso ena haheitalai ita tohotohoa, ita diba iseda haroro gaukara do ita hagugurua. Ena be ruma bese ese ita idia dagedage henia, o ita gorere, o ita buruka, o taunimanima be sivarai namona idia ura lasi kamonai, to unai ese ita idia koua be namo, a? Lasi, Iehova ita lalokau henia dainai, haroro gaukara ita karaia noho be namo.
4. Dirava ita lalokau henia dainai dahaka gaukara namona ita karaia?
4 Lalokau be mai ena siahu, bona haroro gaukara ita karaia neganai ita hahedinaraia ita be Dirava ita lalokau henia bada. (1 Kor. 13:13) Iehova ese ena ladana do ia hahelagaia ela bona hanaihanai negana ia mai haraga dainai, namona be iseda “lalokau be do ia bada lao noho.”—Fili. 1:9; Mat. 22:36-38.