Idau Gado Taudia Durua

1. Iseda teritori ai haroro gaukara ita karaia neganai, daidia ita davaria?

¹ Iesu Keriso ia peroveta, sivarai namona be tanobada ibounai dekenai do idia harorolaia, “unai amo bese ibounai ese idia kamonaia diba.” Haroro bona hadibaia gaukara idia karaia taudia idia laloparara, unai hereva be mai anina bada. (Mat. 24:14; 28:​19, 20) Unai gaukara ita karaia neganai, iseda gado ai idia hereva lasi tano idau taudia ita davaria. Bona Iehova ena gari bada dinana ia do mai lasi lalonai, gau badana be idia danu ese Basileia sivaraina idia kamonai bona hereva momokani totona idia gini goada. (Mal. 3:18) Edena dala ai iseda teritori ai idau gado taudia ita durua diba?

2. Idau gado taudia ita hereva henia neganai, edena dala ai Iehova ita tohotohoa?

² Idau Gado Taudia Dekenai Iehova Ena Lalohadai Hahedinaraia: Iseda teritori ai taunimanima idauidau dekenai Iehova ena lalokau ita hahedinaraia totona, namona be ita durudia Dirava momokanina, Iehova, idia diba namonamo totona, herevana edia gado be idau. (Sal. 83:18; Kara 10:​34, 35) Ena be iseda gado idia diba taudia ita tahua, to namona be idau gado taudia ita lalodia bona dala ita tahua idia dekenai Dirava ena Basileia sivaraina ita harorolaia totona. Bema idau gado taudia ita laloa lasi, anina be Iehova ena ura ita badinaia lasi, badina ena ura be bese ibounai ese iena ura do idia dibaia. Vadaeni, edena dala ai idau gado taudia ita durua?

3. Edena buklet ese ita do ia durua, bona edena dala ai ita hegaegaelaia diba ita gaukaralaia totona?

³ Good News for People of All Nations Buklet Gaukaralaia: Inai buklet idia karaia ena badina be, ita ia durua idau gado ai idia hereva taudia ita davaria neganai, ita hereva henidia totona. Namona be nega ibounai unai buklet oi abia loaloa, ena kahana idauidau oi manadalaia, bona oi hegaegae oi gaukaralaia totona. Buklet lalonai, emu teritori ai idia gaukaralaia gado idauidau oi makaia, unai amo rau oi davaria haraga diba. Bema kongrigeisen ai unai gado ena magasin o buka idia noho, namona be haida oi abia, bona unai buklet oi gaukaralaia murinai, kamonai tauna dekenai magasin o buka oi henia diba.

4. Iseda haroro gaukara ai, edena dala ai Nations buklet ita gaukaralaia diba?

⁴ Bema haroro gaukara ai idau gado tauna ta oi davaria bona oi diba lasi edena gado ai ia hereva, vadaeni buklet ena vaira kahana oi hahedinaraia. Oi kehoa bona tanobada ena mapu oi hahedinaraia, oi sibona oi poinia bena emu tano oi poinia, bona ruma tauna oi nanadaia ia be edena tano amo ia mai bona edena gado ia gaukaralaia. Unai murinai Table of Contents oi itaia, rau maorona oi kehoa bena ataiai ia noho toretore koremana oi poinia, bona ruma tauna oi noia paragraf ia duahia totona. Ia duahia ore neganai, iena gado pepapepa ta oi henia eiava grei kala ai idia makaia herevana oi poinia, unai amo ia diba oi ura magasin o buka ta do oi mailaia. Bena inai hereva koremana “lauegu ladana” oi poinia bona emu ladana oi gwauraia, bena inai hereva koremana “emu ladana” oi poinia bona haere oi naria. Dala oi karaia oi lou henia totona.

5. Idau gado tauna ia kamonai neganai, dahaka ita karaia be namo?

⁵ Lou Henia Totona Dala Karaia: Namona be ita gaukara goada Basileia sivaraina idia kamonai taudia ita lou henia totona, herevana edia gado be idau. Bema ita itaia kamonai tauna ia ura Dirava bona Baibel ia dibaia, namona be Please Follow Up (S-43) fom ta ita hahonua bona kongrigeisen ena seketere dekenai ita henia haraga, bena ia ese brens opesi dekenai do ia siaia, unai amo kamonai tauna ena gado ia diba pablisa ta ese lou henia ia karaia diba. Bena brens opesi ese unai fom be idau gado grup maorona dekenai do ia siaia. Unai grup ese fom ia abia neganai, dala ia karaia pablisa ese unai kamonai tauna ia lou henia totona. Reana seketere ese unai fom ena kopi ta be haroro naria tauna dekenai ia henia, unai amo do ia diba bema unai grup ese unai idau gado taudia ia lou henia eiava. Bema ta ia ura dikadika ia kamonai, vadaeni unai fom ita gaukaralaia be namo.

6. Bema idau gado tauna ta ita davaria, iseda maduna be dahaka?

⁶ Unai (S-43) fom oi henia murinai, nega sisina do ia ore bena unai kamonai tauna ena gado ia diba pablisa be ia do ia lou henia. Unai dainai, kamonai tauna ena ura ia boio lasi totona, unai fom ia henia pablisa ese kamonai tauna do ia vadivadi henia noho ela bona ena gado ia diba tauna idia davaria. Nega haida, kamonai tauna ida Baibel stadi oi karaia diba. To unai negai, pablisa ese edena dala ai kamonai tauna ena gado magasin eiava buka ia abia diba?

7. Edena dala namona ai idau gado buka bona magasin ita abia haraga diba?

⁷ Idau Gado Magasin Bona Buka: Namo lasi kongrigeisen ese idau gado magasin o buka momo idia abia. To, bema haroro naria tauna ia diba idau gado taudia be hereva momokani idia ura henia matamaia, vadaeni ia ese edia gado magasin bona buka haida be kongrigeisen ai ia atoa diba, pablisa ese idia gaukaralaia totona. Bema kongrigeisen ai unai gado magasin bona buka be lasi, oda ia karaia diba. To reana nega sisina daudau murinai, unai magasin bona buka do idia ginidae. Unai dainai, dala namona ta be www.watchtower.org. amo magasin o buka idia printaia diba. Unai web sait ese Baibel buka bona magasin be gado handred momo ai ia hahedinaraia, unai dainai pablisa o kamonai tauna be unai web sait amo ena gado buka o magasin ia itaia bona duahia diba. Momokani, unai buka bona magasin ita gaukaralaia diba, idau gado ai idia hereva taudia edia ura ita habadaia totona.

8. Kongrigeisen ese idau gado idia hereva taudia edia ura habadaia totona, dahaka ia karaia be namo?

⁸ Kongrigeisen Ena Gaukara: Nega haida idau gado idia hereva taudia edia namba ia bada ia lao, to kongrigeisen ta ese hebou be unai gado ai ia karaia lasi. Unai dainai, idau gado idia hereva taudia oi boiria emu kongrigeisen hebou dekenai idia mai totona. Tadikaka taihu ese mai moale ida idia welkam henia karana ese idia do ia hagoadaia, idia hebou hanaihanai totona. Matamanai, do ia auka badina gado bona kastom be idauidau, to Iehova ena Witnes taudia be gau ta ese ia koua lasi Keristani lalokauna idia hahedinaraia totona. (Sep. 3:9; Ioa. 13:35) Idau gado ta oi herevalaia namonamo diba, a? Bema oibe, bona oi ura unai gado ai idia hereva taudia oi lou henia, mani emu kara kongrigeisen ena seketere oi hadibaia, bona ia ese brens opesi do ia hadibaia. Unai ese brens do ia durua, bema gabeai idau gado ai ia hereva kamonai tauna ena ura habadaia totona, iena gado ia diba pablisa ta idia tahua.

9. Edena negai pablisa totona gado sikulina idia karaia diba?

⁹ Gado Sikuli: Idau gado taudia oi durua neganai, namona be idia oi hagoadaia edia gado ena kongrigeisen hebou idia lao henia totona, bema unai be edia gabu kahirakahira ai. To bema lasi, pablisa haida ese idau gado idia dibaia be namo, unai amo kamonai taudia idia durua diba. Bema kahirakahira gabuna ai kongrigeisen be lasi, vadaeni brens opesi ese dala do ia karaia, idau gado taudia be momo dainai, unai gado dibaia sikulina ia karaia totona. Bema unai bamona, namona be brens opesi ese kahirakahira idia noho kongrigeisen ia hadibaia, bona dala do ia karaia unai gado sikulina do idia karaia ena hadibaia hereva idia henia totona. Unai gado sikulina idia ura lao pablisa taudia edia tahua gauna be, do idia hegaegae unai gado ena kongrigeisen o grup dekenai idia lao totona, unai amo heduru idia henia diba.

10. Edena negai idau gado grup ta idia hamatamaia diba?

¹⁰ Grup ta Hamatamaia: Idau gado grup ta hamatamaia totona, mai anina bada gaudia foa idia noho. (1) Idau gado ai idia hereva kamonai taudia momo idia noho be namo. (2) Pablisa haida ese unai gado idia diba o dibaia noho be namo. (3) Ia hegeregere vadaeni elda eiava hesiai tauna ta ia noho idia ia hakaua bona hebou ta be wiki ta ta ai ia karaia totona. (4) Namona be elda oreana ta ia noho unai grup ia durua totona. Unai gaudia foa idia noho neganai, namona be elda oreana ese brens opesi ia tore henia bona unai grup ia herevalaia, bona ia noia edia kongrigeisen ese unai idau gado grup ia durua totona. (Orea bukana rau 106-107 itaia.) Unai grup ia naria elda o hesiai tauna idia gwauraia “grup naria tauna” o “grup hesiai tauna.”

11. Dahaka dainai iseda teritori ai idau gado taudia ita durua be hahenamo ta?

¹¹ Iseda teritori lalonai, idau gado taudia ita durua gaukarana be tanobada hegegemadai haroro gaukara ena kahana badana ta, unai be iseda Haheitalai Tauna namona, Iesu Keriso, ese ia hamatamaia. Namona be mai eda ura bada ida ita gaukara, bena Iehova ese tanobada besedia ia hamarerea bona ia lalokau henia taudia be ena orea lalonai ia hakaua vareai dalana, do ita itaia. (Hag. 2:7) Unai gaukara namona ita durua dainai ita moale bada! Iseda teritori ta ta ai, idau gado taudia durua gaukarana dekenai, Iehova ese iseda hekwarahi do ia hanamoa, bona namona be ita laloatao, herevana taunimanima edia gado be idauidau, to unai ese ita do ia koua lasi, badina Dirava ese inai gaukara ia hatubua diba!​—1 Kor. 3:​6-9.