Guriguri Karana be mai Anina Bada
1. Iseda haroro gaukara ita hagugurua totona, dahaka ita karaia be namo?
1 Ita sibona be haroro gaukara ita hagugurua diba lasi. Unai dainai, Iehova be ita dekenai goada ia henia, unai gaukara ita karaia totona. (Fili. 4:13) Ia ese ena aneru amo ita ia durua mamoe bamona taudia ita davaria totona. (Apok. 14:6, 7) Ita ese hereva momokani ena uhe ita hadoa bona dairi, to Iehova ese unai ia hatubua. (1 Kor. 3:6, 9) Unai dainai, eda guba Tamana ita guriguri henia be gau badana, bona ia dekenai ita tabekau!
2. Dahaka gau haida totona ita guriguri be namo?
2 Ita Sibona Totona: Haroro negadia ta ta ai ita guriguri be namo. (Efe. 6:18) Dahaka gau haida totona ita guriguri be namo? Ita noia ita ia durua, iseda teritori ai lalohadai maorona ita abia bona ita gari lasi totona. (Kara 4:29) Iehova ita noia ita do ia hakaua lao kudou maoro taudia dekenai bona idia ita stadi henia totona. Bema ruma tauna be henanadai ta ia henia, eda lalona dekenai guriguri kwadogina ita gwauraia, Iehova ita noia ita ia durua ruma tauna dekenai haere maorona ita henia totona. (Neh. 2:4) Danu, Iehova ita noia ita dekenai aonega ia henia, unai amo haroro gaukara ita atoa guna totona. (Iam. 1:5) Ma danu, iseda guriguri amo Iehova ita tanikiu henia badina iena hesiai gaukara namona ita karaia.—Kol. 3:15.
3. Ma haida totona ita guriguri neganai, edena dala ai unai ese idia ia durua edia haroro gaukara idia habadaia totona?
3 Ma Haida Totona: Namona be ‘ta ta totona do ita guriguri,’ reana iseda tadikaka bona taihu edia ladana ita gwauraia danu. (Iam. 5:16; Kara 12:5) Oi gorere dainai oi hegeregere lasi haroro gaukara oi karaia totona, a? Vadaeni, idia haroro diba taudia totona oi guriguri be namo. Oiemu guriguri be mai ena siahu dainai, unai ese ma haida do ia durua edia haroro gaukara idia karaia namonamo totona! Danu, gavamani ese haroro gaukara idia koua lasi totona oi guriguri be maoro, unai amo iseda tadikaka be ‘mai maino danu do idia noho namonamo.’—1 Tim. 2:1, 2.
4. Dahaka dainai nega ibounai guriguri karana ita goadalaia be namo?
4 Tanobada hegegemadai sivarai namona harorolaia gaukarana be gaukara badana. Bema ‘guriguri do ita goadalaia nega ibounai,’ vadaeni Iehova ese ita do ia durua unai gaukara ita hagugurua totona.—Roma 12:12.