Pablisa Dekenai Guriguri Bona Gau Haida Lalohadailaia be mai Anina Bada
1. Dahaka ese Iesu ia durua, unai amo gau ta ese ena haroro gaukara, ia koua lasi?
1 Adorahi ta ai, dina ia diho neganai, Iesu be taunimanima edia gorere ia hanamoa bona demoni ia luludia. Murina dinana ai ena hahediba taudia ese ia idia davaria neganai, idia gwau: “Taunimanima ibounai idia tahua oi,” bona ia idia noia ena hoa karadia do ia karaia noho. To, Iesu ia ura lasi gau ta ese ena gaukara badana, sivarai namona harorolaia gaukarana unai, ia koua. Ia gwau: “Namo ita lao hanua haida, unuseni lau ura haroro karaia, badina inai totona lau mai.” Dahaka ese Iesu ia durua haroro gaukarana ia laloa bada totona? Ia be daba maragi ia toreisi ia guriguri bona unai ia lalohadailaia. (Mar. 1:32-39) Edena dala ai guriguri bona gau haida lalohadailaia karana ese ita ia durua, haroro gaukara ita karaia goadagoada totona?
2. Dahaka gaudia ita lalohadailaia karana ese ita do ia durua haroro gaukara ita karaia goadagoada totona?
2 Dahaka Gaudia Lalohadailaia? Iesu ia itaia taunimanima “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mat. 9:36) Unai hegeregerena, ita lalohadailaia diba gaudia be, taunimanima hida ese sivarai namona idia kamonai be namo. Eiava nega be kwadogi. (1 Kor. 7:29) Ita lalohadailaia gaudia ma haida be, Iehova ena gaukara bona ena kara namodia, ita be Iehova ena Witnes taudia, bona Baibel amo hereva momokani, iseda teritori ai idia noho taudia idia diba lasi gaudia ita dibaia.—Sal. 77:11-13; Isa. 43:10-12; Mat. 13:52.
3. Edena negai gau ta ita lalohadailaia diba?
3 Edena Negai Unai Gaudia Ita Lalohadailaia? Iesu bamona, haida ese unai kara be daba maragi, regerege lasi neganai idia karaia. Ma haida idia gwau, unai kara be idia do mahuta lasi neganai idia karaia. (Gen. 24:63) Ena be ita bisi bada, to nega ita atoa diba mai anina bada gaudia ita lalohadailaia totona. Haida be PMV lalonai idia noho neganai unai idia karaia. Ma haida be edia laga-ani negana idia gaukaralaia unai idia karaia totona. Momo idia davaria haroro gaukara idia do karaia lasi neganai, mai anina bada gaudia idia lalohadailaia guna be namo, herevana nega sisina lalonai unai idia karaia—unai ese idia ia durua haroro gaukara be mai goada bona gari lasi ida idia karaia totona.
4. Dahaka dainai mai anina bada gaudia ita lalohadailaia be namo?
4 Guriguri bona gau haida lalohadailaia karana ese ita do ia durua Iehova hesiai henia urana ita habadaia, iseda tomadiho karana ita lalohadailaia, bona ita do ia hagoadaia haroro gaukara ita karaia noho totona. Dirava ena Hesiai Tauna Badana, Iesu, be mai anina bada gaudia ia lalohadailaia dainai namo ia davaria, bona ita danu unai kara amo namo do ita davaria.