Oi be Edena Medikol Heduru Maorona Do Oi Abia Hidi?
Tanobada hegegemadai, hospital momo dekenai, doketa momo be rara lasi opereisen idia karaia. Oi diba o laloparara edena opereisen o muramura dekenai be rara idia gaukaralaia lasi, a? Unai gaudia oi diba be namo, unai amo medikol heduru bona opereisen totona abia hidi maorona oi karaia diba. Inai vidio No Blood—Medicine Meets the Challenge itaia. Bena, henunai idia noho henanadai amo emu diba oi tohoa.—Itaia: Opereisen haida be laulau lalonai do idia hedinarai dainai, tama sina be edia natudia danu unai vidio idia itaia neganai, aonega idia gaukaralaia be namo.
(1) Iehova ena Witnes taudia ese rara henia hanai karana idia dadaraia ena badina badana be dahaka? (2) Iehova ena Witnes taudia be medikol heduru idia tahua neganai, dahaka idia ura? (3) Gorere taudia dekenai dahaka maoro ia noho? (4) Dahaka dainai rara lasi muramura ita abia be badina maorona laloa bada bona maduna huaia karana? (5) Rara momo ita haboioa neganai, doketa taudia ese dahaka gau rua idia karaia haraga guna? (6) Doketa taudia ese rara idia gaukaralaia lasi totona, dahaka gaudia foa idia karaia diba? (7) Doketa taudia ese edena dala ai (a) rara bada halusia karana idia koua diba, (b) sel kakakaka idia haboua, (c) rara idia habadaia, bona (d) rara idia atoa lou? (8) (a) Hemodilution bona (b) cell salvage oi gwauraia hedinarai. (9) Oi abia diba heduru ma haida dekenai dahaka diba oi ura abia be namo? (10) Doketa taudia be rara idia henia lasi opereisen badadia idia karaia diba, a? (11) Doketa taudia momo be dahaka idia karaia noho?
Vidio lalonai idia hahedinaraia medikol heduru daladia be Keristani ta ta sibona ese do ia abia hidi. Oi bona emu natudia totona, edena rara lasi opereisen do oi abia hidi bona oi be mai emu Advance Medical Directive/Release kadi, a? Hereva ma haida totona, namona be July 1, 2004, bona October 15, 2000, edia Gima Kohorona dekenai “Duahia Taudia Edia Henanadai” itaia. Emu abia hidi be emu Witnes lasi ruma bese taudia dekenai oi gwauraia hedinarai be namo.