Hesiai Gaukaradia Totona Natudia Hadibaia
1. Salamo 148:12, 13 ese Keristani tama sina ia hagoadaia dahaka idia karaia totona?
1 Iehova ese matamata taudia ia boiria ia idia hanamoa totona. (Sal. 148:12, 13) Unai dainai, Keristani tama sina ese edia natudia dekenai Baibel ena hereva momokani bona Dirava ena taravatu idia hadibaia. To unai sibona lasi, namona be idia hadibadia sivarai namona ena hesiai taudia ai idia lao totona. Edena dala ai unai idia karaia diba?
2. Edena dala ai tama sina edia haheitalai namona ese natudia ia durua diba?
2 Haheitalai Namona: Hahemaoro tauna Gideona ese ena tatau 300 ia hamaoroa: “Lau do umui itaia namonamo.” (Gun. 7:17) Nega momo natudia be edia tama sina idia itaia bona edia kara idia tohotohoa. Tama ta be hanuaboi ai ia gaukara, to Saturday dabai ruma dekenai ia giroa lou neganai, ia mahuta lasi to ena natudia ia hakaudia lao haroro gaukara totona, ena be ia hesiku bada. Ena be ia hereva lasi, to ena kara amo ena natudia ia hadibaia haroro gaukara be mai anina bada. (Mat. 6:33) Emui natudia idia itaia oi be mai moale ida tomadiho ena kahana idauidau, hegeregere guriguri, Baibel duahiduahi, hebou dekenai haere, bona haroro gaukara oi karaia, a? Momokani, oi be haheitalai goevadaena lasi. To bema emu natudia idia itaia oi be oi gaukara goada Iehova oi hesiai henia totona, idia danu do idia ura Iehova idia tomadiho henia.—Deu. 6:6, 7; Roma 2:21, 22.
3. Tomadiho karana dekenai, tama sina ese natudia idia durua, dahaka tahua gaudia idia atoa bona hagugurua totona?
3 Tahua Gaudia: Tama sina idia hekwarahi bada edia natudia idia hadibaia idia raka, hereva, sibodia idia hegoeva, bona gau ma haida idia karaia totona. Natudia idia tubu daekau noho lalonai, sibodia totona tahua gaudia matamatadia idia atoa. Bema tama sina be Keristani taudia, namona be edia natudia edia mauri lagani bona diba hegeregerena, idia durudia iseda tomadiho karana dekenai tahua gaudia idia atoa bona hagugurua totona. (1 Kor. 9:26) Emui natudia oi hadibaia sibodia edia hereva amo idia haere bona Tiokratik Haroro Sikuli ai, sibodia edia tok idia hegaegaelaia totona, a? (Sal. 35:18) Idia oi hadibaia hesiai gaukara idauidau idia karaia totona, a? Idia oi durua bapatiso bona ful-taim hesiai gaukara be edia tahua gauna ai idia halaoa totona, a? Idia oi durua mai moale ida haroro gaukara idia goadalaia taudia idia bamoa totona, bona idia ese do idia hagoadadia, a?—Aon. 13:20.
4. Natudia idia do maragi neganai, tama sina edia hadibaia karana ese edena dala ai idia do ia durua?
4 Salamo torea tauna ia gwau: “Dirava e, lau be mero negana dekena amo, oi ese lau oi hadibaia vadaeni, bona unai negana ia mai bona hari, lau ese oiemu hoa karadia lau gwauraia vadaeni, bona do lau gwauraia noho.” (Sal. 71:17) Emui natudia idia do maragi negana amo oi hadibadia hesiai taudia ai idia lao totona. Tama sina edia heduru dainai natudia be idia bada daekau neganai edia hesiai gaukara do idia karaia!—Aon. 22:6.