Emu Haroro Gaukara Laloa Bada
1. Tanobada ai, momo ese iseda haroro gaukara be edena bamona idia laloa?
1 Satani ena tanobada ai, momo idia laloa iseda haroro gaukara be ‘kavakava’ gauna. (1 Kor. 1:18-21) Bema ita naria namonamo lasi, unai lalohadai kererena ese eda lalona ia hamanokaia bona haroro gaukara karaia urana ita haboioa diba. (Aon. 24:10; Isa. 5:20) Dahaka dainai Iehova ena Witnes taudia ai ita lao ena hahenamo ita laloa bada?—Isa. 43:10.
2. Dahaka dainai haroro gaukara be ‘gaukara helagana’?
2 ‘Gaukara Helagana’: Aposetolo Paulo ese sivarai namona harorolaia gaukarana ia gwauraia, ‘gaukara helagana.’ (Roma 15:15, 16) Edena dala ai haroro gaukara be ‘gaukara helagana’? Unai gaukara ita karaia dainai, ita be “Helaga Tauna,” Iehova, ida ita “gaukara hebou,” unai amo ena ladana ita hahelagaia. (1 Kor. 3:9; 1 Pet. 1:15) Iehova ia diba iseda haroro gaukara be “boubou gauna bamona,” bona unai be iseda tomadiho ena kahana badana ta.—Heb. 13:15.
3. Dahaka dainai sivarai namona harorolaia gaukarana be hahenamo badana?
3 Sivarai namona harorolaia gaukarana be hahenamo badana ta bona haida sibona ese idia karaia. Aneru be mai moale ida unai gaukara idia karaia namonamo diba. (1 Pet. 1:12) To Iehova ese ita ia abia hidi unai gaukara hereadaena ita karaia totona, ena be ita goevadae lasi, “hodu” manokana bamona.—2 Kor. 4:7.
4. Edena dala ai ita hahedinaraia haroro gaukara ita laloa bada?
4 Haroro Gaukara Atoa Guna: Iseda haroro gaukara ita laloa bada dainai, iseda mauri lalonai ia be ‘mai anina bada gauna’ ta. (Fili. 1:10) Unai dainai, wiki ta ta ai nega ita atoa haroro gaukara ita karaia totona. Bema nahu ia diba tauna ta be Olympic tim lalonai ia vareai, do ia hegaegae bona ia gaukara goada ena nahu dalana ia hanamoa totona. Unai hegeregerena, haroro gaukara ita do lao lasi neganai, ita hegaegae guna, unai amo ‘hereva momokani ita hadibaia maoromaoro,’ bona iseda ‘hadibaia dalana’ ita hanamoa.—2 Tim. 2:15; 4:2.
5. Daika ese iseda haroro gaukara ia laloa bada?
5 Taunimanima edia lalohadai kererena ese emu lalona ia hamanokaia lasi be namo. Laloatao, iseda teritori ai momo ese iseda gaukara idia do laloa bada. To, ita be taunimanima edia lalonamo ita tahua lasi. Gau badana be Iehova ita hamoalea, badina Ia ese iseda gaukara ia laloa bada.—Isa. 52:7.