Iehova ese Haroro Gaukara Totona Ita Ia Hadibaia
1. Iehova ese taunimanima dekenai gaukara ia henia neganai, dahaka ia karaia danu?
1 Iehova ese taunimanima dekenai gaukara ia henia neganai, idia dekenai heduru ia henia danu unai gaukara idia hagugurua totona. Hegeregere, Iehova ese Noa ia hamaoroa lagatoi ta do ia karaia neganai, Noa be guna unai gaukara ia karaia lasi, to Iehova ese karaia dalana ia hadibaia. (Gen. 6:14-16) Iehova ese manau tauna Mose be Israela tatau badadia bona Farao dekenai ia siaia lao neganai, ia gwau: “Lau be oiemu hereva do lau durua. Do oi gwauraia herevadia dohore lau henia oi dekenai.” (Eso. 4:12) Iehova ese ita dekenai sivarai namona harorolaia gaukarana ia henia neganai, ita ia rakatania lasi. To, Tiokratik Haroro Sikuli bona Hesiai Hebou amo ita Ia hadibaia. Edena dala ai inai hadibaia karana amo namo ita abia diba?
2. Edena dala ai Tiokratik Haroro Sikuli amo namo ita abia diba?
2 Tiokratik Haroro Sikuli: Hebou dekenai oi do lao lasi neganai, unai wiki ena sediual ai idia noho gaudia oi hegaegaelaia. Bena stiuden taudia ese edia tok idia henia neganai, unai ese oi ia durua emu hadibaia dalana oi hanamoa totona. (Aon. 27:17) Emu Haroro Sikuli bukana oi mailaia bona eksasais buka bamona oi gaukaralaia. Tok ta ta murinai, sikuli naria tauna ese unai buka ia herevalaia neganai, oi ura badinaia point badadia oi makaia bona edia badinai hereva haida oi torea. Unai sikuli amo namo bada oi abia totona, dala namona be kahana haida oi karaia be namo. Sikuli dekenai emu ladana oi henia vadaeni, a? Tok pepana oi abia neganai, namona be oi hegaegae namonamo bona oi abia sisiba herevana oi badinaia. Bona haroro gaukara ai, oi dibaia gaudia oi gaukaralaia.
3. Dahaka ese ita ia durua Hesiai Hebou amo namo ita abia totona?
3 Hesiai Hebou: Unai hebou ita do lao lasi neganai, namona be Iseda Basileia Gaukara pepa ita duahia guna bona do ita haerelaia kahadia ita makaia, unai amo heduru hereva namodia momo ita laloatao diba. Bema iseda haere be kwadogi, momo do idia haere diba. Haheitalai idia karaia neganai, oi itaia namonamo, bona unai heduru herevadia be emu haroro gaukara ai oi gaukaralaia diba. Bema Iseda Basileia Gaukara ai atikol haida ese haroro gaukara idia herevalaia, unai ita dogoatao be namo.
4. Dahaka dainai Iehova ese ita dekenai ia hadibaia gaudia ita gaukaralaia namonamo?
4 Iehova ese Noa bona Mose dekenai ia henia gaukara be mai edia hekwarahi, unai hegeregerena tanobada ibounai sivarai namona harorolaia gaukarana be mai ena hekwarahi. (Mat. 24:14) Bema Iehova, iseda Hadibaia Tauna Badana dekenai ita tabekau bona ita dekenai Ia hadibaia gaudia ita gaukaralaia namonamo, do ita kwalimu diba.—Isa. 30:20.