Oi Gari Lasi
1. Dahaka totona oi gari lasi be namo?
1 Nega ta sikuli ai oi ura lasi haroro badina oi idia kirikirilaia garina oi gari, a? Haroro totona oi gari lasi be namo, bona bema oi be hemarai tauna unai be mai anina bada. Dahaka ese oi do ia durua?
2. Sikuli ai oi ura haroro neganai, edena dala ai oi laloa namonamo?
2 Laloa Namonamo: Ena be oi laloa sikuli be haroro gabuna namona, to laloatao, Baibel be ibounai dekenai oi herevalaia diba lasi, ruma-ta-ruma-ta ai oi karaia bamona. Namona be oi laloa namonamo edena negai do oi hereva. (Had. 3:1, 7) Bema klas ai gau ta umui herevalaia o asainmen ta oi abia, o bema sikuli turadia ese oi idia nanadaia dahaka dainai sikuli ena gaukara haida lalonai oi vareai lasi, unai be nega namona emu abidadama oi gwauraia hedinarai totona. Keristani taudia haida be sikuli ia hamatamaia neganai, tisa idia hadibaia idia be Iehova ena Witnes taudia bona ita abia dae gaudia ia herevalaia buka o magasin be tisa dekenai idia henia. Haida be edia desk latanai buka o magasin idia atoa, sikuli turadia ese idia henanadailaia totona.
3. Edena dala ai oi hegaegae sikuli ai oi haroro totona?
3 Hegaegae: Bema oi hegaegae, do oi gari lasi. (1 Pet. 3:15) Unai dainai do idia henia henanadai bona oi haerelaia daladia oi laloa. (Aon. 15:28) Bema mai dalana, emu Baibel bona buka haida, hegeregere Herevalaia buka, Memero Kekeni Edia Henanadai bukadia, bona Dirava ese ia havaraia gaudia idia herevalaia buka o magasin oi abia lao, unai amo oi gaukaralaidia diba. Emu tama sina oi noia diba, ruma bese tomadiho lalonai, haheitalai umui karaia totona.
4. Dahaka dainai sikuli ai oi haroro noho?
4 Lalohadai Maorona: Oi laloa lasi hereva momokani oi herevalaia neganai, emu turadia be hanaihanai oi do idia kirikirilaia. Haida be reana emu lalogoada karana dainai do idia hoa bona idia kamonai. To ta ia kamonai lasi neganai, oi lalomanoka lasi. Emu hekwarahi dainai Iehova do ia moale. (Heb. 13:15, 16) Hanaihanai Iehova oi noia oi do ia durua ‘mai gari lasi ida oi hereva noho’ totona. (Kara 4:29; 2 Tim. 1:7, 8) Mani oi laloa, ta ia kamonai neganai do oi moale bada. Reana gabeai ia be Iehova ena hesiai tauna ai ia lao diba!