Hadibaia Tauna Namona Ena Kara Badana
1. Hadibaia tauna namona ena kara badana be dahaka?
1 Dahaka ese ta ia durua hadibaia tauna namona ai ia lao totona? Sikuli badana, hereva momokani ai ia noho daudau, o ena diba, a? Lasi, to lalokau ese ia durua. Unai kara be taravatu ia hagugurua, ia be Iesu ena hahediba taudia edia kara ta, bona Iehova ena kara badana ta. (Ioa. 13:35; Gal. 5:14; 1 Ioa. 4:8) Hadibaia taudia namodia ese lalokau idia hahedinaraia.
2. Dahaka dainai taunimanima ita lalokau henia be gau badana?
2 Taunimanima Lalokau Henia: Hadibaia Tauna Badana, Iesu, ese taunimanima ia lalokau henia, bona unai ese idia ia hagoadaia ia idia kamonai henia totona. (Luka 5:12, 13; Ioa. 13:1; 15:13) Bema taunimanima ita laloa bada, dala ia kehoa negadiai idia do ita haroro henia. Ena be idia dagedage bona idia ura lasi kamonai, to unai ese ita do ia koua lasi. Do ita hahedinaraia ita haroro henia taudia ita laloa bada bona idia laloa bada gaudia hegeregerena eda haroro herevadia do ita haidaua. Danu nega bada ita atoa stiuden ta ta edia stadi ita karaia, bona edia stadi totona ita hegaegae namonamo guna.
3. Edena dala ai Baibel ena hereva momokani ura henia karana ese ita do ia durua?
3 Baibel Ena Hereva Momokanidia Ura Henia: Iesu be Baibel ena hereva momokanidia ia ura henia bona dava bada kohudia bamona ia laloa. (Mat. 13:52) Bema hereva momokani ita ura henia, mai ura bada ida do ita haroro, bona unai ese taunimanima edia lalona do ia veria idia kamonai totona. Hereva momokani ura henia karana ese ita do ia durua, eda diba ena hetoana ita laloa momo lasi, to ita harorolaia hereva namodia do ita laloa bada bona mai gari lasi ida do ita haroro.
4. Edena dala ai lalokau karana ita habadaia diba?
4 Lalokau Habadaia: Edena dala ai taunimanima lalokau henia karana ita habadaia? Iehova bona iena Natuna ese idia hahedinaraia lalokauna bona eda teritori ai Baibel idia diba namonamo lasi taudia ita laloa. (Mar. 6:34; 1 Ioa. 4:10, 11) Hanaihanai sibona eda stadi bona laloa dobu karana ese iseda ura Baibel ena hereva momokanidia dekenai do ia habadaia. Lalokau be lauma helaga ena huahua ta. (Gal. 5:22) Unai dainai, guriguri amo Iehova ita noia diba lauma helaga ia henia bona ita ia durua eda lalokau ita habadaia totona. (Luka 11:13; 1 Ioa. 5:14) Herevana sikuli badana ita lao, hereva momokani ai ita noho daudau, o eda diba be bada, to hadibaia taudia namodia ai ita lao diba, bema lalokau ita hahedinaraia.