Hari Palani Karaia Haroro Gaukara Habadaia Totona
1. Dahaka dainai Memorial negadia be mai anina bada, bona dahaka ita karaia be namo?
1 Memorial negadia ta ta ese dala ia kehoa ‘Iehova ita hanamoa’ totona. (Sal. 109:30) Iehova ese mauri davalaia boubouna ia henia dainai, emu tanikiu karana oi hahedinaraia totona, March lalonai haroro gaukara oi habadaia diba, a? Hari be nega namona unai oi palanilaia totona.—Aon. 21:5.
2. Vanegai April ai heduru painia ena hora idia hamaragia neganai, emu hemami be edena bamona? Bona ma haida be edena bamona?
2 Heduru Painia: Vanegai lagani ai, April ai heduru painia ena hora idia hamaragia dainai, kongrigeisen idia moale bada bona momo be heduru painia idia karaia. Tadikaka ta ia gwau: “Haisikuli ai lau sikuli noho dainai, regula painia lau karaia be auka. To April ai, heduru painia aplikeisen do lau atoa hora 30 hagugurua totona, bona do lau hekwarahi hora 50 lau abia totona.” Ful-taim moni gaukara ia karaia taihu ta ia gwau: “Hora 30 lau hagugurua diba!” Hora idia hamaragia ena hadibaia hereva idia gwauraia neganai, guna ia painia taihu ta, ena mauri lagani be 80 bamona, ia gwau: “Lau naria noho negana be inai! Iehova ia diba egu mauri lalonai painia gaukara lau moalelaia bada!” Heduru painia idia karaia diba lasi taudia be palani idia karaia haroro gaukara idia habadaia totona.
3. Dahaka dainai March, April bona May ai heduru painia ita karaia?
3 March be hua namona heduru painia ita karaia totona, badina unai hua ai eda ura hegeregerena hora 30 o 50 ita hagugurua diba. Danu, Saturday, March 17 ia matamaia neganai, Memorial ena boiboi pepana do ita hariharilaia, bona taunimanima do ita boiria April 5 ai do ita karaia Memorial hebouna idia mai totona. Momo be unai gaukara badana do idia moalelaia dainai, do idia ura April bona May lalonai danu idia heduru painia, hora 50 hagugurua totona.
4. Edena dala ai eda haroro gaukara ita habadaia, bona ena namo be dahaka?
4 Ruma Bese Ena Tomadiho ai, emui famili ida Memorial negana ai ta ta ese ena haroro gaukara ia habadaia diba dalana umui herevalaia be namo. (Aon. 15:22) Iehova umui noia emui hekwarahi ia hanamoa totona. (1 Ioa. 3:22) Haroro gaukara umui habadaia neganai, Iehova do umui hanamoa bona do umui moale bada.—2 Kor. 9:6.