Koini Maragidia Rua

Basileia ena gaukara ita durua dala badana ta be inai: Iseda kontribusen moni amo tanobada ibounai haroro gaukarana ita durua. To bema eda moni be hegeregere lasi be edena bamona?

Nega ta Iesu ia itaia ogogami vabuna ta ese koini maragidia rua be moni mauana lalonai ia udaia. Ia be Iehova ia lalokau henia dainai, “ena be ia ogogami,” to “ia ese ena mauri durua moni ibounai” ia henia. (Mar. 12:41-44) Iesu ese ia hahedinaraia Dirava ese unai vabu ena kontribusen ia laloa bada. Danu, aposetolo edia negai, Keristani taudia be kontribusen henia karana idia laloa bada. Ena be idia ogogami o taga to idia henia diba hegeregerena idia henia. Paulo ia gwau, ena be Makedonia taudia “idia ogogami momokani” to “idia noia loulou, edia harihari gauna do idia henia” totona.​—2 Kor. 8:1-4.

Unai dainai, ena be “koini maragidia rua” sibona ita henia, to ita laloatao gauna be inai: Kontribusen maragidia momo be moni badana ai ia lao diba. Momokani, mai eda kudouna ibounai ida kontribusen ita henia neganai, iseda hariharibada guba Tamana do ita hamoalea, badina “mai moale ida ia henia tauna be Dirava ese ia lalokau henia.”​—2 Kor. 9:7.