Emu Darana Oi Gimaia
1. Hesiai laganina 2013 ena sekit hebouhebou ena sinado be dahaka? Bona unai program idia karaia ena badina be dahaka?
1 Iesu ese ena hahediba taudia ia hamaoroa, Iehova do idia lalokau henia mai edia kudouna, mauri, bona darana ibounai ida. (Mat. 22:37, 38) Kahirakahira do ita abia distrik hebouhebou, sekit bona dina tamona hebouhebou be mai anina bada gaudia do idia herevalaia, bona ita do idia durua bada. Hegeregere hari lagani ena distrik hebouhebou ena sinado be, “Emu Kudouna Oi Gimaia!” Hesiai laganina 2013 ena dina tamona hebouhebou ena sinado be, “Emu Lalomamina Oi Gimaia.” Bona sekit hebouhebou ena sinado be, “Emu Darana Oi Gimaia,” ia be Mataio 22:37 amo idia abia. Inai program ese ita ta ta do ia durua eda lalona o darana ita tahua namonamo, unai amo ita diba ita lalohadailaia gaudia be Iehova ese ia moalelaia o lasi.
2. Edena henanadai edia haere do ita tahua?
2 Do Idia Herevalaia Gaudia: Sekit hebouhebou ena program ita kamonai neganai, namona be henunai idia noho henanadai badadia edia haere ita tahua:
• Edena dala ai taunimanima edia lalohadai ita dadaraia?
• Abidadama lasi taudia edia lalona ia hadiburaia gaudia be edena bamona ita kokia diba?
• Daika ena laloa dalana ita abia be namo?
• Laloa dobu karana ena namo haida be dahaka?
• Edena dala ai Iehova ese eda laloa dalana ia hamaoromaoroa?
• Edena dala ai tatau, hahine, tama sina, bona natudia idia gaukara hebou famili hamoalea totona?
• Edena dala ai Iehova ena dina totona ita hegaegae diba?
• Gaukara badana totona iseda lalona ita hegaegaelaia ena anina be dahaka?
• Ita dibaia gaudia badinaia karana ena namo be dahaka?
3. Dahaka dainai sekit hebouhebou ita lao, ita kamonai namonamo, bona ita dibaia gaudia ita badinaia be mai anina bada?
3 Satani ia ura iseda lalona o darana ia hamiroa. (2 Kor. 11:3) Unai dainai, gau badana be eda darana ita gimaia bona biagua namonamo. Namona be Keriso ena lalohadai ita abia bona inai tanobada ena lalona veria karadia ita dadaraia. (1 Kor. 2:16) Unai dainai, palani oi karaia sekit hebouhebou oi lao totona. Danu, tok ibounai oi kamonai namonamo. Ita dibaia gaudia ita badinaia neganai, unai ese ita do ia durua eda lalona ita hegaegaelaia Basileia sivaraina ita harorolaia goadagoada totona.—1 Pet. 1:13.