Adorahi ai Oi Haroro Diba, A?
1. Aposetolo Paulo ena ruma-ta-ruma-ta haroro gaukara be buka ta ese edena bamona ia herevalaia?
1 Buka ta (Daily Life in Bible Times) ia gwau, nega momo aposetolo Paulo ese ruma-ta-ruma-ta ai haroro gaukara ia karaia, “4 p.m. ela bona hanuaboi momokani.” Paulo ese unai sediual ia badinaia be ita diba lasi, to ita diba gauna be inai: Ia be mai ena ura ida ‘sivarai namona totona gau ibounai ia karaia.’ (1 Kor. 9:19-23) Anina be, bema Paulo ia itaia edena negai taunimanima momo do ia davaria, vadaeni sediual ia karaia, unai negai ruma-ta-ruma-ta haroro gaukara ia karaia totona.
2. Dahaka dainai adorahi be nega namona ita haroro totona?
2 Vaia, tano momo ai, pablisa momo be wiki ta ta lalodiai, daba ai, ruma-ta-ruma-ta haroro gaukara idia karaia. To, emu gabu ai unai be nega namona oi haroro totona, a? Painia ta be ena teritori ia herevalaia neganai, ia gwau: “Dina ai taunimanima be ruma ai idia noho lasi. To adorahi ai momo be edia ruma ai idia noho.” Adorahi be nega namona tatau dekenai sivarai namona ita harorolaia totona. Unai nega ai ruma taudia be idia laga-ani bona idia ura herevahereva. Bema umui laloa adorahi ai haroro gaukara umui karaia be namo, vadaeni namona be elda ese sediual idia karaia.
3. Adorahi ai ita haroro neganai, edena dala ai ita aonega?
3 Ita Aonega: Adorahi ai ita haroro neganai, ita aonega be mai anina bada. Hegeregere, bema oi itaia ruma tauna be ia aniani, reana oi hadibaia gabeai oi giroa lou totona. Bema gabu ia dibura, namona be ruma tauna ese oi ia itaia diba gabunai oi gini, bona maoromaoro emu ladana bona emu vadivadi ena badina oi gwauraia. Aonega karadia haida be inai: Ma ta ida oi gaukara hebou, o grup ida oi gaukara hebou, bona lamepa ese ia hadiaria gabudiai oi haroro, oi sibona oi gaukara lasi. Danu, namo lasi ruma taudia idia mahuta gwauraia negadiai oi vadivadi. (2 Kor. 6:3) Bema oi laloa dibura negadiai emu gabu ai oi haroro be seif lasi, vadaeni gabu ia do dibura lasi negadiai o adorahi ai oi haroro be namo.—Aon. 22:3.
4. Adorahi ai ita haroro ena namo be dahaka?
4 Ena Namo: Taunimanima ita haroro henia neganai ita moale. Danu, momo ita haroro henia ena namo ma ta be inai: Dala ita kehoa Dirava ese ma haida do “ia hamauria bona hereva momokani ena diba maoromaoro do idia abia.” (1 Tim. 2:3, 4) Emu sediual oi haidaua diba adorahi ai oi haroro totona, a?