Pepapepa amo Sivarai Namona Harorolaia
1. Dirava ena taunimanima be edena dala ai pepapepa idia gaukaralaia?
1 Lagani momo lalonai Iehova ena Witnes taudia ese Baibel idia herevalaia pepapepa idauidau amo sivarai namona idia harorolaia. Lagani 1880 ai, C. T. Russell bona ena bamodia ese Bible Students’ Tracts (gabeai idia gwauraia, Old Theology Quarterly) idia karaia matamaia, bona Watch Tower duahia taudia dekenai idia henia, bena idia ese taunimanima dekenai idia hariharilaia. Idia itaia pepapepa be mai anina bada dainai, lagani 1884 ai C. T. Russell ese Basileia ena gaukara habadaia totona, koporeisen ta ia rejista neganai, inai hereva “tract” ia gaukaralaia danu. Unai koporeisen ladana be Zion’s Watch Tower Tract Society, hari idia gwauraia Watch Tower Bible and Tract Society of Pennsylvania. Lagani 1918 ai, Bible Student taudia ese pepapepa 300 milioni mai kahana idia hariharilaia. Hari negai danu, pepapepa be haroro gaukara ena tulu namona ta.
2. Pepapepa ena namo be dahaka?
2 Ena Namo: Pepapepa edia laulau be mai edia kala idauidau bona hairai. Edia sivarai be kwadogi, ta ena lalona ia veria, bona ia durua diba. Ruma taudia haida idia ura lasi magasin o buka idia abia, to idia ura pepapepa idia duahia, badina edia hereva be momo lasi. Pablisa matamatadia bona natudia ese pepapepa idia hariharilaia be auka lasi. Danu, pepapepa be maragi bona ita abia loaloa diba.
3. Oi sibona emu ekspiriens o paragraf ai ia noho ekspiriens amo pepapepa ena namo oi herevalaia.
3 Momo be pepapepa amo hereva momokani idia dibaia. Hegeregere, Haiti ai hahine ta be dala ai iseda pepapepa ta ia itaia. Ia abia isi, ia duahia, bona ia gwau: “Hereva momokani lau davaria vadaeni!” Gabeai Kingdom Hall ia lao, Baibel stadi ia hamatamaia, bona ia bapatiso—unai ibounai ia vara ena badina be, pepapepa ai Dirava ena Hereva ia lalopararalaia.
4. Bema pepapepa be hua ena henia gauna, iseda tahua gauna be dahaka?
4 Ruma-ta-Ruma-ta Ai: Pepapepa be haroro gaukara ena tulu namona ta dainai, November ia hamatamaia amo, ia be iseda henia gauna ta ai do ia lao. Iseda tahua gauna be pepapepa ita hariharilaia sibona lasi, to ita gaukaralaia haroro herevana ita hamatamaia totona. Bema vadivadi ginigunana ai ruma tauna ia kamonai o lou henia ita karaia, Baibel Hadibaia bukana o buka ma ta amo stadi dalana ita hahedinaraia diba. Ruma-ta-ruma-ta ai pepapepa be edena bamona ita hariharilaia diba? Pepapepa be idauidau dainai, do ita hariharilaia gauna ita duahia namonamo guna be namo.
5. Ruma-ta-ruma-ta ai pepapepa be edena bamona ita hariharilaia diba?
5 Teritori ai idia noho taudia idia laloa bada gaudia hegeregerena, hamatamaia hereva maorona ita gwauraia bona pepapepa maorona ita gaukaralaia. Ruma tauna dekenai pepapepa ita henia herevahereva ita hamatamaia totona. Pepapepa ena vairana kahanai ia noho laulau ese ena lalona ia veria diba. Eiava pepapepa haida ita hahedinaraia bona ia ura henia gauna ia abia hidi. Bema teritori haida ai taunimanima idia ura lasi edia iduara idia kehoa, reana ruma tauna ese do ia itaia diba dalanai pepapepa ita dogoatao, o ita noia bema ia namo iduara henunai ita atoa bona ita ura ena lalohadai ita diba danu. Bema pepapepa ena sinado be henanadai ta, ita noia ena lalohadai ia gwauraia totona. Eiava sibona ita hegaegaelaia henanadai ta amo ruma tauna ida herevahereva ita hamatamaia. Bena ruma tauna ida pepapepa ena kahana haida ita duahia, idia torea henanadai ita henia, bona ita noia ena lalohadai ia gwauraia totona. Siri badadia be Baibel amo ita duahia diba. Kahana haida ita herevalaia murinai, dala ita karaia ita lou henia totona. Bema emu teritori ai taunimanima idia noho lasi rumadia dekenai magasin oi rakatania, reana pepapepa ta be raka hanai taudia ese idia itaia lasi gabunai oi atoa diba.
6. Dala haroro ai pepapepa be edena bamona oi gaukaralaia diba?
6 Dala Haroro: Dala haroro ai pepapepa oi gaukaralaia danu, a? Raka hanai taudia haida be gabu ta idia lao totona idia haraga dainai, idia ura lasi ita idia hereva henia. Reana oi diba lasi bema do ia ura kamonai o lasi. Ia dekenai magasin matamata oi henia lasi, badina oi diba lasi do ia duahia o lasi, to pepapepa ta oi henia diba. Pepapepa ena vairana kahanai laulau namodia idia noho bona ena hereva be momo lasi dainai, reana do ia ura abia bona miniti haida lalonai ia duahia. To bema gabu ta lao totona idia haraga lasi, vadaeni idia ida pepapepa ena kahana haida ita herevalaia diba.
7. Nega bona gabu idauidau ai pepapepa hariharilaia ena ekspiriens herevalaia.
7 Nega Bona Gabu Idauidau Ai: Nega bona gabu idauidau ai pepapepa amo ta oi haroro henia be auka lasi. Tadikaka ta be ruma ia rakatania negadiai ena poketi ai pepapepa haida ia udaia. Stoa ai ia gaukara tauna ta ia davaria neganai, ia hamaoroa ia ura ia dekenai duahiduahi gauna ta ia henia, bena pepapepa ia henia. Headava tau bona hahine be loaloa totona New York City idia lao neganai, idia diba tano idauidau taudia do idia hedavari henia. Unai dainai, Nations buklet bona gado idauidau ai idia hahanaia pepapepa idia abia lao danu. Bona bema idia kamonai dala badinai ia hoihoi tauna, o loaloa o aniani gabudiai edia badinai idia helai taudia be gado ma ta ai idia hereva, vadaeni edia gado ena pepapepa idia henia.
8. Edena dala ai pepapepa be uhe ida ita hahegeregerea diba?
8 ‘Uhe Oi Hadoa’: Pepapepa be uhe ida ita hahegeregerea diba. Biru tauna ta be gabu idauidau dekenai uhe momo ia negea loaloa, badina ia diba lasi edena uhe be do ia tubu bona huahua do ia atoa. Hadibaia Tauna 11:6 ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” Unai dainai, namona be ita gaukara goada pepapepa amo ma haida ita durua “diba namona” idia abia totona.—Aon. 15:7.
[Blurb on page 3]
Pepapepa be haroro gaukara ena tulu namona ta dainai, November ia hamatamaia amo, ia be iseda henia gauna ta ai do ia lao