Baibel Stadi Hamatamaia—Herevana Ita Bisi Bada
1. Dahaka dainai haida be taunimanima dekenai Baibel stadi idia herevalaia lasi?
1 Haida be taunimanima dekenai Baibel stadi idia herevalaia lasi badina idia bisi bada. Momokani, Baibel stadi ta karaia totona, nega ita atoa be namo. Namona be nega ita atoa stadi totona ita hegaegae, stiuden ida ita stadi, bona ia ita durua koua gaudia ia hanaia totona. Aposetolo Paulo ia gwau, ia be ena mauri ia henia Tesalonika taudia ia durua Iehova idia dibaia totona. (1 Tes. 2:7, 8) Ena be ita bisi bada, to edena dala ai Baibel stadi ita karaia diba?
2. Iehova ita lalokau henia dainai, edena bamona eda nega ita gaukaralaia?
2 Tomadiho Totona Nega Atoa: Momokani, tomadiho totona nega ita atoa be namo. Hegeregere, nega ita atoa hanaihanai hebou ita lao, ita haroro, Baibel ita duahia, bona ita guriguri. Headava tau o hahine ena gaukara be momo, to mai moale ida nega do ia atoa ena adavana ida gau haida idia karaia totona. Ita be Iehova ita lalokau henia dainai, namona be mai moale ida eda ‘nega ita gaukaralaia namonamo’ Ia ita tomadiho henia totona. (Efe. 5:15-17; 1 Ioa. 5:3) Iesu ena hereva bamona, hahediba taudia halaoa gaukarana be iseda tomadiho ena kahana badana ta. (Mat. 28:19, 20) Bema unai ita laloa dobu, unai ese ita do ia durua mai eda lalona ibounai ida Baibel stadi ita karaia totona.
3. Edena dala ai ta ita stadi henia noho diba, ena be gau haida dainai eda sediual ita badinaia lasi?
3 To bema moni gaukara ita karaia, nega daudau ita gorere, o tiokratik gaukara ma ta dainai eda sediual ita badinaia lasi, dahaka ita karaia diba? Pablisa haida be nega haida gabu ta idia lao neganai, fon o kompiuta amo edia Baibel stadi idia karaia. Pablisa haida be idia gorere dainai, edia stadi taudia idia boiria bona edia ruma ai idia stadi. Ma haida be dala idia karaia idia noho lasi negadiai, pablisa ta ese edia Baibel stadi ia karaia totona.
4. Baibel stadi ita karaia ena hahenamo haida be dahaka?
4 Paulo be ena nega bona goada ia henia, ma haida ia durua hereva momokani idia dibaia dainai ia moale bada. (Kara 20:35) Tesalonika ai ia durua taudia ibounai ia laloa neganai, unai ese ena kudouna ia hamarerea bona Iehova ia tanikiu henia. (1 Tes. 1:2) Herevana ita bisi bada, to bema Baibel stadi karaia totona nega ita atoa, eda hesiai gaukara do ita moalelaia bada.