Peroveta Taudia Tohotohoa—Iona
1. Iona ena kara namodia haida be dahaka?
1 Peroveta tauna Iona oi laloa neganai, dahaka oi laloa? Haida idia gwau Iona be gari momo tauna o hebogahisi lasi tauna. To ia be manau, gari lasi, bona sibona ena ura dadaraia karana ia hahedinaraia tauna. Edena dala ai Iona ena ‘haheitalai namona ita badinaia’ diba?—Iam. 5:10.
2. Edena dala ai Iona ena manau karana ita tohotohoa diba?
2 Manau: Matamanai, Iona be Dirava ese ia siaia gabuna ia lao lasi, to gabu ma ta ia heau lao. Reana unai bamona ia karaia badina ia diba Asuria taudia be dagedage taudia bona Nineva idia gwauraia ‘rara bubua hanua.’ (Nah. 3:1-3) To Iehova ese Iona ia matahakani henia neganai, ia manau bona Dirava ese ia henia gaukarana ia karaia. (Aon. 24:32; Iona 3:1-3) Ena be matamanai Iona ia heau boio, to gabeai Iehova ena ura ia karaia. (Mat. 21:28-31) Ena be matahakani ita abia o teritori ai taunimanima idia kamonai lasi, to Iona bamona, eda lalona ita hadaia sivarai namona ita harorolaia totona.
3. Edena bamona negadiai mai gari lasi ida ita haroro bona sibona eda ura ita dadaraia be namo?
3 Gari Lasi Bona Sibona Eda Ura Ita Dadaraia: Iona ia laloparara ena disisen kererena dainai, kahirakahira bouti taudia idia mase, bona ia laloa idia totona ia mase be namo. (Iona 1:3, 4, 12) Gabeai, Nineva ai ia haroro neganai, ia be hanua lalonai ia raka vareai, reana gabu namona ta ia tahua unai amo Iehova ena hahemaoro herevana do ia harorolaia. Ia karaia karana ese ia hahedinaraia ia be gari lasi tauna! (Iona 3:3, 4) Ita be edena bamona? Dirava amo goada ita abia be namo, dagedage negadiai mai gari lasi ida ita haroro totona. (Kara 4:29, 31) Haroro gaukara totona eda nega bona kohu ita gaukaralaia amo, ita hahedinaraia sibona eda ura ita dadaraia.—Kara 20:24.
4. Dahaka dainai nega ita atoa Iehova ena peroveta taudia edia haheitalai namodia ita laloa totona?
4 Iehova ena peroveta taudia edia sivarai oi duahia neganai, namona be emu lalona ai oi piksaia oi be unai sivarai lalonai oi noho. Sibona oi nanadaia: ‘Bema unai be lau, dahaka do lau karaia? Edena dala ai iena kara namodia lau tohotohoa diba?’ (Heb. 6:11, 12) Iseda Basileia Gaukara gabedia ese Iehova ena peroveta taudia ma haida do ia herevalaia, bona edia sivarai amo mai anina bada gaudia do ita dibaia.