Eda Haroro Dala Namona Ta

1. Atikol matamatana ita gaukaralaia ena badina rua be dahaka?

¹ Eda pablik Gima Kohorona ena atikol matamata ta ena ladana be, “Dekena Tauna ida Herevahereva.” Inai atikol matamatana ita gaukaralaia ena badina rua be, (1) Baibel ena hahediba herevadia be lalona veria dalanai ita harorolaia, bona (2) ita ia hadibaia edena bamona mai aonega ida taunimanima edia henanadai ita haerelaia. (1 Pet. 3:15) Edena dala ai inai atikol ita gaukaralaia namonamo diba?

2. Edena bamona eda haroro ai atikol matamata ita gaukaralaia diba?

² Haroro ai Gaukaralaia: Bema Gima Kohorona haida ai unai atikol ia noho, vadaeni kopi haida oi abia loaloa. Bena ruma tauna, kamonai tauna, o Baibel stiuden be henanadai ta ia henia o unai atikol matamata ena topik ta ia gwauraia neganai, vadaeni magasin oi henia bena oi noia unai umui herevalaia totona. Bema oi dekenai unai magasin ia noho lasi, reana jw.org amo unai oi daonloud diba.

3. Edena dala ai atikol matamata be ta ida ita herevalaia diba?

³ Edena dala ai atikol matamata be ta ida ita herevalaia diba? Haida idia gwau, ‘Kamonai tauna ai noia atikol ai dekena tauna ena hereva ia duahia, bena ai be Witnes ena hereva ai duahia. Unai be dala namona badina kamonai tauna ia durua ita abia dae herevadia ia dibaia, bona hepapahuahu ia vara lasi.’​—⁠Deu. 32:2.

4. Edena dala ai atikol matamata amo ita sibona ita hadibaia?

⁴ Oi Sibona Bona Ma Haida Oi Hadibaia: Unai atikol matamatana oi duahia neganai, Baibel siri, haheitalai idauidau, bona point namodia oi laloa. Edena hemami be atikol ai idia gaukaralaia? Namona be emu haroro ai unai bamona hemami ida oi hereva toho. (Aon. 1:5; 9:9) Taihu ta ia gwau: “Inai atikol idauidau lau duahia neganai, gau momo lau dibaia​—⁠unai be hegeregere haroro ia diba momo painia ta ese hereva dalana maorona be lau dekenai ia hadibaia noho!”

5. Edena dala ai iseda Baibel stiuden ita durua haroro totona ia hegaegae?

⁵ Danu, atikol matamata be emu Baibel stiuden ida umui hegaegaelaia, gabeai haroro ai ia tohoa totona. Atikol umui duahia neganai, namona be stiuden ese Witnes ena kahana ia duahia. Unai ese stiuden ia durua, ia abia dae gaudia be mai aonega ida ia harorolaia totona. (Kol. 4:6) Momokani, Iehova be “Dekena Tauna ida Herevahereva” atikol amo ita ia durua eda haroro gaukara ita “hagugurua momokani” totona.​—⁠2 Tim. 4:5.