Eda Haroro Gaukara Ita Karaia Namonamo Dalana—Herevahereva Oi Hamatamaia

Mai Anina Bada: Ruma-ta-ruma-ta gaukara ita karaia neganai, nega momo taunimanima be edia ruma ai ita davaria lasi. To, reana PMV ai, hospital ai, moni gaukara o sikuli edia laga-ani negadiai, o gabu ma haida ai idia ita davaria. Iehova ia ura taunimanima ibounai ese Basileia ena sivarai idia kamonai. (1 Tim. 2:3, 4) Ita haroro totona, herevahereva ita hamatamaia be namo.

Karaia Dalana:

Do oi hereva henia tauna do ia ura kamonai bona herevahereva, a? Nega ia hegeregere umui herevahereva namonamo totona, a? Pablisa haida be do idia hereva henia tauna idia kiri henia. Bema unai tauna ia kiri danu, vadaeni herevahereva idia hamatamaia.
Iesu be Samaria hahinena ia hereva henia neganai, maoromaoro Basileia ia herevalaia lasi. (Ioa. 4:7) Nega haida hanamoa hereva amo herevahereva ita hamatamaia, hegeregere: “Emu natudia edia kara be namo herea!” Dala ma ta be henanadai karana amo, hegeregere: “Varani hanuaboi ena nius oi itaia, a?”
Nega maoronai unai oi karaia. Reana lalona veria hereva ta oi gwauraia, unai ese dala ia kehoa kamonai tauna ia hereva o henanadai totona. Hegeregere, bema ruma bese maurina umui herevalaia, oi gwau diba: “Natudia naria namonamo karana dekenai sisiba namodia haida lau davaria.” Bema nius ta oi herevalaia, oi gwau diba: “Nega momo sivarai dikadia lau duahia, to vanegai sivarai namodia haida lau duahia bona lau moalelaia.” Bema emui herevahereva ia ore, to ia oi haroro henia lasi oi lalomanoka lasi be namo.

Hari Hua ai Oi Tohoa Gauna be Inai: